Astanadaǵy «Álem» saýda ortalyǵy jabylýy múmkin
ASTANA. Aqpannyń 20-sy. QazAqparat /Jasulan Amanbaıuly/ - Astanadaǵy «Álem» saýda ortalyǵyndaǵy et ónimderiniń sanıtarlyq jaǵdaıy nashar. Búgin ortalyqtyń et bóliminde tekserý júrgizgen Aýyl sharýashylyǵy vıtse-mınıstri Arman Evnıev pen Agroónrkásip kesheniniń memlekettik ınspektsııasy komıtetiniń tóraǵasy Serik Súleımenov osyndaı qorytyndyǵa keldi,
dep habarlaıdy QazAqparat.
«Bul oqıǵa birinshi ret tirkelip otyr. Eger ortalyqtaǵy sanıtarlyq ahýal jónge keltirilmeı, jaǵdaıy odan ári nasharlasa «Álem» saýda ortalyǵyn jabamyz», dedi eldiń bas ınspektory S. Súleımenov.
Onyń aıtýynsha, sanıtarlyq qadaǵalaý ınspektorlary saýda oryndaryn kún saıyn qadaǵalap otyrýy tıis bolatyn. Alaıda olardyń qaıda qarap júrgenderi belgisiz. Inspektsııanyń kórsetkenindeı, et tasymaldaıtyn arbalar jýylmaıdy, medıtsınalyq tekseris tıisti deńgeıinde jasalmaıdy jáne taǵy osy sııaqty buzýshylyqtar bar.
«Tártip boıynsha ınspektorlar kún saıyn tekseris jasap, sanıtarlyq jaǵdaılar jasalǵan kezde ǵana satý júrgizýge ruqsat beredi. Búgingi ýaqytqa deıin «Álem» saýda ortalyǵynda ınspektorlar eshqandaı buzýshylyqtardy tappaǵan. Degenmen bizdiń tekserisimiz jaǵdaıdyń tipti de nashar ekendigin kórsetti. Sondyqtan da jaýapty ınspektorlar jumystaryna salǵyrt qaraǵany úshin tıisti ákimshilik sharalarǵa tartylatyn bolady», dep atap kórsetti ol.
Atalmysh tekseristi júrgizýge Aýyl sharýashylyǵy mınıstriniń jeke blogyna jáne anonımdi senim telefondaryna qadaǵalaýshy organdar tarapynan kórsetiletin qysymdar men zańsyz aqsha jınaý týraly túsken aryz-shaǵymdar sebep bolǵan.
