Astanadaǵy «Alaý» muzaıdyny saraıy jyldamdyq boıynsha álemdegi 6-shy oryndy ıelendi
ASTANA. 5 jeltoqsan. QazAqparat - 26 jeke, 4 ulttyq jáne 3 trek rekordy - bul demalys kúnderinde Astanadaǵy «Alaý» muz aıdynynda jalaýyn jelbiretken ІІІ Álem kýbogi kezeńiniń qorytyndylary.
«Alaý» uzaq qashyqtyqtardaǵy rekordtardy jańartý arqyly óziniń álemdegi deńgeıin edáýir joǵarylatyp, úzdik 10-dyqqa endi.
Áıelder reıtıngisinde Martına Sablıkovanyń 5 myń metr qashyqtyqtaǵy kórsetken ónerinen keıin stadıon eki satyǵa kóterilip, 11-shi orynǵa turaqtady. Martına úshin «Alaý» osymen ekinshi ret sáttilik syılady. Ótken jyly ol 3 myń metr qashyqtyqta birinshi kelgen, endi mine Kýboktyń eki kezeńindegi sátsizdikten keıin taǵy da altyn tuǵyrǵa shyqty.
Al Iorrıt Bergsma 10 myń metrlik qashyqtyqta álemdik rekordqa sál ǵana jetpeı qaldy. Onyń 12.50,40 mınýttyq kórsetkishi arenany álemdik reıtıngtiń 6-shy satysyna joǵarylatty. Endi onyń aldynda jazyq syrǵanaqtardan tek gollandtyq Tıalf pen norvegtik Hamar arenalary ǵana bar. Bul eki syrǵanaq alańynyń da tarıhy tym áriden bastalady, onda tarıhtaǵy ataqty konkıshiler óner kórsetken. Al «Alaý» bolsa osymen ekinshi ret qana álemdik deńgeıdegi jarysty ótkizip otyr. Sondyqtan, onyń bolashaǵy áli alda degen sóz.
Qazaqstandyq sportshylar úshin óz alańyndaǵy kezeń sátti ótti. Kýbok ortasha jáne alys qashyqtyqtarǵa jáne toptyq jarystarǵa arnalǵan bolatyn. Bul jarystarda negizgi úmit Dmıtrıı Babenkoǵa artyldy jáne ol úmitti aqtady. Óte alys qashyqtyqta petropavldyq sportshy Qazaqstannyń rekordyn jańartty, kórsetkishi - 13.10,31.
Kýbok aıaqtalǵan soń Qazaqstan quramasy Naganoǵa attandy, onda Álem kýboginiń sprınterlik kezeńi ótedi.
