Astanadaǵy «Alaý» muz saraıynda konkımen júgirý sportynan birneshe jarys bastalady
ASTANA. 5 qańtar. QazAqparat - 7 qańtarda Astanadaǵy «Alaý» muz saraıynda konkımen júgirý sportynan úsh jarys bastaý alady.
«Alaý» muz saraıynyń resmı saıtynda ornalastyrylǵan aqparatqa súıensek, onda túrli qashyqtyqtar boıynsha Azııa chempıonaty, klassıkalyq kópsaıys boıynsha Álem chempıonatyna qatysý úshin Azııa elderi arasynda óńirlik biliktilik jarysy jáne Azııa memleketteri jasóspirimderi arasyndaǵy ISU óńirlik álem kýbogy tartystary ótedi.
Atap aıtqanda, Astanada Japonııanyń, Ońtústik Koreıa, Monǵolııa, Úndistan, sondaı-aq Qazaqstannyń ulttyq quramalary jattyǵý jumystaryn ótkizýde.
Klassıkalyq kópsaıys boıynsha Azııa elderi arasyndaǵy óńirlik biliktilik jarysy Álem chempıonatyna irikteý bolyp tabylady. Onyń jeńimpazdary bıyl 18-19 aqpanda Máskeýde ótetin klassıkalyq kópsaıysta 2012 jylǵy Álem chempıonatynda Azııa qurlyǵyn tanystyratyn bolady. Bunyń júldegerleri kópsaıystyń upaıy boıynsha anyqtalady. Erler 500, 5000, 1500 jáne 10 000 metr qashyqtyqtar boıynsha, al áıelder 500, 3 000, 1500, sondaı-aq 5 000 metr qashyqtyqtar boıynsha tartysqa túsedi. Álem chempıonatyna kvotalar eki er adamǵa jáne 4 áıel sportshyǵa beriledi.
Úsh saıystyń ishinde óńirlik biliktilik saıysy mańyzdy sanalady. Atalǵan eki kvota úshin deńgeıleri boıynsha ózara teń qazaqstandyq Dmıtrıı Babenko, japondyq Hırokı Hırako, koreılik Sýn-Hýn Lı baq talastyrady.
