Astanadaǵy Alaý estafetasy qyzyqty sátterge toly bolady - Alaý estafetasy dırektsııasy
ASTANA. 28 qańtar. QazAqparat /Arman Asqarov/ - Erteń, 29 qańtar kúni Astanada bastalatyn 7-Qysqy Azııa oıyndarynyń Alaý estafetasy qyzyqty sátterge toly bolady. Bul týraly búgin ótken baspasóz máslıhatynda Alaý estafetasy dırektsııasy jetekshisiniń orynbasary Sársen Quranbek aıtty.
Onyń habarlaýynsha, Azıadanyń Alaý estafetasy erteń, 29 qańtar kúni keshki saǵat 17:00-de Astana qalasyndaǵy Beıbitshilik pen kelisim saraıyna jetkiziletin bolady. Olımpıada otyn kútip alý rásimi kezinde teatrlanǵan qoıylymdar uıymdastyrylady. Alaý estafetasy Qazaq eli monýmentinen bastaý alyp, elordanyń kórikti jerlerin aralap ótkennen keıin, estafetanyń birinshi kezeńi Memlekettik rámizder alańynda aıaqtalatyn bolady. Alaý estafetasynyń ekinshi kezeńi 30 qańtar kúni Astana qalasy ákimdigi aldyndaǵy alańnan bastalady. Ol jerde astanalyq «Barys» komandasy óz ónerin kórsetpek. Odan keıin Alaý Abaı, Respýblıka dańǵyldary arqyly Qorǵaljyn kópirine túsedi. Sol jerde Esil ózeniniń ústimen júrip ótetin bolady. Munda da sportshylar arnaıy shoý uıymdastyrmaq. Sol kúni Alaý estafetasynyń ekinshi kezeńi Han Shatyrda aıaqtalady. «Tehnıkalyq úzilisten keıin «Astana-Arena» stadıonynda ótetin 7-Qysqy Azııa oıyndarynyń saltanatty ashylý rásiminde olımpıadanyń qasıetti oty Azıadanyń bas qazandyǵynda jaǵylatyn bolady», - deıdi S.Quranbek.
