Astanadaǵy aqyly turaqtardyń sany 7 myńnan 10 myńǵa deıin kóbeıtiledi
ASTANA. QazAqparat – Astana qalasy kólik jáne jol-kólik ınfraqurylymyn damytý basqarmasy aqyly turaqtardyń sany 7 myńnan 10 myńǵa deıin kóbeıtiletinin málim etti, dep habarlaıdy QazAqparat tilshisi.
«Memleket-jeke menshik áriptestigi shartyna sáıkes 10 myń turaq ornyn iske qosý josparlanýda. Qazirge deıin 7 myń aqyly turaq oryndary iske qosyldy. Barlyq aqyly turaqtarda «Astana turaq keńistigi» JShS parkomattar men jol belgilerin ornatty. Barlyq aqyly turaqtar kommýnaldyq menshik bolyp tabylady», - delingen ákimdiktiń QazAqparat saýalyna joldaǵan jaýabynda.
Basqarmanyń deregi boıynsha, búginge deıin áleýmettik nysandar mańynda (aýrýhanalar, emhanalar, mektepter, balabaqshalar) aqyly turaqtardyń bári alynyp tastalǵan. Qazir bul turaqtarǵa kólik qoıý tegin.
«Elordada qala ákimdiginiń tapsyrmasy boıynsha «Astana turaq keńistigi» JShS 55 turaqtaǵy 1680 aqyly turaq oryndaryn joıdy. Áleýmettik jáne basqa da nysandarǵa jaqyn ornalasqan 55 jer ýchaskesinen aqyly avtoturaq alynyp tastaldy. Máselen, «Saryarqa» aýdanynda – 860, «Almaty» aýdanynda – 325, Baıqońyr aýdanynda – 107, Esil aýdanynda – 388 aqyly turaq oryndary alynyp tastaldy. Aqyly turaqtar alynyp tastalǵan aýmaqtarda sáıkesinshe, kólik turaǵy tegin bolady», - delingen resmı málimette.
