Astanadaǵy «aqyldy aýdan» qandaı bolady

ASTANA. QazAqparat - Astanadaǵy "Jastar" aýdanynda barlyq ınnovatsııalyq texnologııalar engiziletin bolady. Negizgi maqsat - turǵyndar úshin barynsha yńǵaıly ári qaýipsiz jaǵdaı jasaý. Osy tájirıbeniń negizinde "aqyldy qalanyń" standarttary ázirlenip, barlyq aýdandarǵa taratylatyn bolady, dep xabarlaıdy QazAqparat tilshisi.

"Astana Innovation" AQ basqarma tóraǵasy Oljas Sartaevtyń aıtýynsha, ilki jobany qolǵa alǵanǵa deıin aýdan turǵyndary arasynda saýalnama júrgizildi. Sonyń negizinde turmysta ózekti degen problemalar anyqtaldy. Osydan keıin birqatar texnologııalardy engizý sharalary bastaldy.

"Jalpy, 31 texnologııany engizý josparlanǵan. Bunyń barlyǵy jekemenshik ınvestıtsııalardyń esebinen jasalady. Máselen, sý, gaz jáne jaryqty esepteýish quraldarynyń barlyq málimetterin radıobaılanys arqyly jiberý bastamasy bar. Bul degenimiz, baqylaýshylarǵa árbir páterge baryp, esepteýish quraldaryn tekserýdiń qajeti joq. Búkil málimetter avtomatty túrde túsip turady. Eski esepteýish quraldaryn aýystyrmaı-aq, arnaıy datchıkterdi de qoıýǵa bolady. Sol datchıkter aqparatty jiberip otyrady. Ony otandyq mamandar usyndy", - dedi O.Sartaev búgin ótken Halyqaralyq sáýletshiler kongresinde.

Onyń aıtýynsha, "aqyldy domofon" jobasy aıasynda páter ıesi domofondy basqan adamdy beınebaılanys arqyly óz smartfonynan kóre alady. Al "qaýipsiz qala" boıynsha barlyq beınekameralardy biryńǵaı júıege qosý josparlanǵan.

"Aqyldy jolaýshylar jolaǵy" degen bastama da bar. Qarańǵy kezde, ıa bolmasa, tuman bolǵanda lazerlik jaryq jolaýshynyń ótip bara jatqanyn kórsetip turady. Budan bólek, kúl-qoqysty bólip qabyldaý beketteri bolady. Al fın texnologııasy negizinde daladaǵy aýa temperatýrasyna qaraı úıdegi jylýdy rettep otyrýǵa múmkindik bar. Ol úshin ishte jáne syrtta arnaıy datchıkter ornatylady" , - dep atap kórsetti O.Sartaev.