Astanadaǵy Agrarlyq ýnıversıtette jańa taǵaıyndaýlar jasaldy

Basqarý tıimdiligin arttyrý maqsatynda jáne ýnıversıtettiń ǵylymı keńesiniń 2012 jylǵy 17 qańtardaǵy sheshimine sáıkes, Basqarma tóraǵasynyń ǵylymı jumystar jáne halyqaralyq baılanystar jónindegi orynbasary qyzmeti - Basqarma tóraǵasynyń ǵylym, halyqaralyq baılanystar jáne ınvestıtsııalar jónindegi orynbasary etip ózgertilip, laýazymǵa Laýra Úmitbekqyzy Sadyqova taǵaıyndaldy.

L.Sadyqova aýyl sharýashylyǵy ǵylymdarynyń kandıdaty. Sońǵy jumys orny - QR Aýyl sharýashylyǵy mınıstrligi «QazAgroInnovatsııa» AQ-nyń birinshi vıtse-prezıdenti (2009 jyldyń sáýir aıynan 2011 jyldyń mamyr aıy aralyǵynda). 

Sondaı-aq, 17 qańtarda ótken Ǵylymı keńestiń otyrysynda QR Bilim jáne ǵylym mınıstrliginiń 2009 jyldyń 13 shildesindegi № 338-inshi buıryǵyna sáıkes, tárbıe jumysy jónindegi jeke prorektor laýazymyn engizý jáne tárbıe jumysy jónindegi arnaıy departament qurý usynyldy.

Soǵan oraı, buǵan deıin Aleksandr Vıktorovıch Maıer atqaryp kelgen Tárbıe jumysy jáne áleýmettik máseleler jónindegi orynbasary laýazymynyń ataýy men mindetter ózgertildi. Jańadan engizilgen - Basqarma tóraǵasynyń ınfraqurylymdy damytý jónindegi orynbasary qyzmetin A.Maıerdiń ózi atqaratyn bolyp sheshilse, ekinshi jańa qyzmetke - Basqarma tóraǵasynyń tárbıe jumysy jónindegi orynbasarlyǵyna taǵaıyndaý ázirshe jasalǵan joq.

Sonymen qatar, S.Seıfýllın atyndaǵy QazATÝ Tárbıe jumysy jónindegi departament dırektory qyzmetine tehnıka ǵylymdarynyń kandıdaty, dotsent Qaırat Baǵasharuly Másenov taǵaıyndaldy. Q. Másenov buǵan deıin ýnıversıtettiń agronomııa fakýlteti ekologııa jáne orman sharýashylyǵy kafedrasynyń meńgerýshisi boldy.