Astanadaǵy Agrarlyq ýnıversıtette stýdentter úshin saýyqtyrý kesheni bar medıtsınalyq ortalyq ashyldy

Ortalyqty saltanatty jaǵdaıda oqý ornynyń rektory Aıtbaı Bulashev pen Astana qalasy ákimdigi Іshki isaıasat basqarmasynyń bastyǵy Bolat Tilepov ashty.

A.Bulashev atap kórsetkendeı, saýyqtyrý kesheni bar medıtsınalyq ortalyqty ashý ıdeıasy osydan eki-úsh jyl buryn týyndaǵan. Biraq ony júzege asyrý eshkimdi aınalyp ótpegen álemdik qarjy daǵdarysynyń salqyny qaıtqannan keıin múmkin boldy. «Ondaǵy basty maqsat - ótkir jáne sozylmaly aýrýlarmen aýyratyn, ımmýndyq júıesi nashar stýdentterdiń densaýlyǵyn nyǵaıtý bolyp tabylady. Ýnıversıtet stýdentter men qyzmetkerlerdiń densaýlyǵyn nyǵaıtýǵa, salaýatty ómir saltyn qalyptastyrýǵa qashan da úlken kóńil bóledi. Mysal úshin JOO negizinde 16 sport sektsııasy jumys isteıdi. Birqatar sport túrleri boıynsha stýdentterimiz respýblıkalyq qana emes, álemdik deńgeıdegi jeńisterge qol jetkizip otyr», - dedi ol.

Medıtsınalyq ortalyq stýdenttik qalashyq aýmaǵynda ornalasqan. Qabyldaýdy terapevt, fızıoterapevt jáne ÝZI dıagnostıkalaryn jasaıtyn dárigerler júrgizedi. Onda EKG men ÝZI dıagnostıkalaryn, massaj jáne egý em-domdaryn jasaıtyn kabınetter bar.

Ortalyq dárigerleri stýdenttiń densaýlyǵynan kinarat tapqan boıda, nemese ol sozylmaly aýrý túri boıynsha esepte tursa, ony joldamamen osy qalashyqta ornalasqan saýyqtyrý keshenine emdelýge jiberedi. Saýyqtyrý kesheni de zamanaýı medıtsınalyq quraldarmen jabdyqtalǵan. Atap aıtqanda, Ýltra joǵary jıilikti terapııa quraly, «Iskra» dorsonvalızatsııa apparaty, lazerlik terapııaǵa arnalǵan qural, portatıvti ıngalıator, magnıoterapııaǵa arnalǵan MAG-3 jáne Ýltra kúlgin sáýlemen emdeý apparattary bar. Olardy satyp alýǵa ýnıversıtet bıýdjetinen 10 mln. teńge qarjy jumsalǵan. Keshenniń jeke trenajerlik zaly men ashanasy bar. Stýdentterge em-dom tolyǵymen aqysyz negizde júrgiziledi. Keshen ambýlatorlyq bolǵandyqtan onda 20 jatyn oryn bar. Stýdentterdiń tek tamaqtanýyna JOO on kúndik emdik kýrsta 15 myń teńge jumsamaq. Bir jylda munda kem degende 500 stýdentke em kórsetý kózdelip otyr.

Ýnıversıtet basshylyǵynyń aıtýynsha, óziniń saýyqtyrý kesheni bar mundaı medıtsınalyq ortalyq Astananyń JOO-lary janynan alǵash ashylyp otyr. Onyń balamasy bolmaǵandyqtan, medıtsınalyq ortalyqty jumys isteý barysynda jetildirilip, qajetti qosymsha medıtsınalyq qural-jabdyqtar satyp alynyp otyrady. JOO rektory, Saýyqtyrý kesheniniń aýqymy keleshekte keńeıtilýi múmkindigin de joqqa shyǵarmady.