Astanadaǵy Agrarlyq ýnıversıtet Naýryz meıramyn atap ótti

Ýnıversıtet qabyrǵasynda Naýryz dýmany úsh kún toılandy.

Oqý ornynyń rektory Aıtbaı Bulashevtyń aıtýynsha, úsh myń jyldan astam tarıyhy bar Áz-Naýryzdy atap ótý joralǵylaryn molynan qamtý, salt-dástúrlerimizdi barynsha kóbirek kórsetý jáne stýdentter men professorlyq-oqytýshylyq quramdy keńinen jumyldyrý úshin, bıyl mereke alǵash ret, oqý ornynyń barlyq 9 fakýltetinde jeke-jeke qurylǵan aýyldarda atap ótildi.

Mysalǵa, alǵashqy kúni tehnıkalyq fakýltettiń ujymymen jasalǵan «Aqsaqaldar» aýyly bata berý rásimin, kompıýterlik júıeler fakýltetiniń «Áıgerim» aýyly qyz uzatý dástúrin kórsetti, al sáýlet óneri fakýltetine qonys tepken «Sheberler» aýyly ulttyq kıimder men qolóner buıymdarynan kórme uıymdastyrdy.

Sol sııaqty meıramnyń ekinshi kúni ekonomıkalyq, veterınarlyq jáne energetıkalyq fakýltetteriniń ujymdary qurǵan «Abaı», «Birlik» jáne «Altybaqan» aýyldary kelin túsirý, besikke salý, quda túsý salttaryn kórsetti.

Al sońǵy kúni, agronomııa, jerge ornalastyrý jáne gýmanıtarlyq fakýltetterinde qurylǵan «Báıterek», «Aqyndar» jáne «Tolaǵaı» aýyldarynda tusaý kesý, kórisý rásimderin jáne aqyndar aıtysyn kórýge boldy.

Eń úzdik aýyldy anyqtaý maqsatynda birneshe adamnan quralǵan qazylar alqasy ár kúni aýyl-aýyldy aralap, ujymdardyń merekelik baǵdarlamalaryn tamashalady. Qazylar aýyldardyń daıyndyq sheberligin «merekelik bezendirý», «ulttyq kıimder kııý», «ulttyq taǵamdar jasaý», «ulttyq sport oıyndaryn kórsetý», «salt-dástúrlerden kórinis kórsetý» sanattary boıynsha baǵalady.

Úsh kún qatarynan molynan jaıylǵan dastarhan, sahnalyq qoıylymdar men kontserttik baǵdarlamalar tek stýdentter men oqytýshylar úshin ǵana emes, merekege kelgen olardyń otbasylaryna da úlken dýmanǵa aınaldy.

Qazylar alqasy, Ulystyń Uly kúni dostyq pen beıbitshiliktiń nyshany bolǵandyqtan júldeli oryndardy birneshe fakýltetterge bólip berýdi uıǵardy. Máselen, birinshi oryndy - agronomııalyq fakýltet, ekinshi oryndy - tehnıkalyq jáne veterınarlyq fakýltetter, al úshinshi oryndy - sáýlet óneri jáne gýmanıtarlyq fakýltetter aldy.