Astanadaǵy Agrarlyq ýnıversıtet ǵylymı-zertteý dárejesin alýǵa nıetti
ASTANA. 7 naýryz. QazAqparat - Astanadaǵy S.Seıfýllın atyndaǵy Qazaq agrotehnıkalyq ýnıversıteti ǵylymı-zertteý dárejesin alýdy kózdep otyr.
Ýnıversıtet rektory Aqylbek Kúrishbaevtyń tóraǵalyq etýimen JOO-nyń Ǵylymı keńesiniń kezekti májilisi ótti. Kún tártibinde qaralǵan máselelerdiń biri - ýnıversıtettiń ǵylymı quramdas bóligin arttyrý. Sebebi JOO aldaǵy ýaqytta ǵylymı-zertteý dárejesin alýǵa nıetti. Ýnıversıtettiń 2010-2011 oqý jylyndaǵy ǵylymı-zertteý jumystarynyń nátıjeleri týraly esepti Basqarma tóraǵasynyń ǵylym, halyqaralyq baılanystar jáne ınvestıtsııa jónindegi orynbasary Laýra Sadyqova usyndy.
L.Sadyqova ýnıversıtettiń jalpy tabysyndaǵy ǵylymnyń úlesin anyqtap kórsetti. Onyń atap ótýinshe, agronomııa, veterınarııa jáne mal sharýashylyǵy tehnologııasy fakýltetteri JOO boıynsha qarjylandyrylatyn ǵylymı jobalarmen belsendi aınalysady. Bul fakýltetterde, sondaı-aq ǵylymı áleýetter men stýdentterdi ǵylymı jumystarǵa tartý qarqyny joǵary. Ǵylymı-zertteý jumystar az júrgiziletin fakýltetter tıisinshe, synǵa alynyp, bul baǵyttaǵy jumystarǵa jaýapkershilik dekandarǵa júkteldi. Talqylaý nátıjesinde Ǵylymı keńes músheleri ýnıversıtettiń 2011-2015 jyldarǵa arnalǵan Damý josparyna ózgerister engizý, ǵylym departamentin qurý, ǵylymı jýrnaldardy halyqaralyq reıtıng talaptaryna sáıkestendirý jáne ózge de sheshimderdi qabyldady.
Sondaı-aq keńes barysynda ǵylymı kitaphananyń ótken oqý jylyndaǵy jumysynyń, sondaı-aq kitaphananyń kitap qoryna júrgizilgen tekseristiń qorytyndylary qaraldy. Atalǵan másele boıynsha, kitap qoryn tolyqtyrý, elektrondy aqparat bazasyn qurý, kitaphananyń barlyq bólimshelerin ınternetke qosý sheshildi.
Sonymen birge keńes barysynda baspaǵa usynylatyn ýnıversıtet ǵalymdarynyń oqýlyqtary men oqý quraldary anyqtaldy.
