Astanadaǵy ádebı-sazdy balǵa kelgender «Abaı» jáne «Pýshkınmen» kezdesti

Elorda turǵyndary úshin umytylmas keshti Qazaqstan Respýblıkasynyń Ulttyq akademııalyq kitaphanasynyń ujymy uıymdastyryp otyr. Aıtýly sharanyń «ádebı-sazdy» dep atalýy da tegin emes. «Qazaqstan» kontsert zalynyń záýlim ári keń foıesine kitaphana ujymy «Rýhanı jańǵyrý» baǵdarlamasymen úndes oqýlyqtardyń kórmesin ótkizdi. Otandyq ári álemge tanymal aqyndar men jazýshylardyń úzdik týyndylarymen birge, jınalǵan qaýym ótken ǵasyrdyń 30-40 jyldarynda latyn álipbıinde jaryqqa shyqqan kitaptarmen tanysýǵa múmkindik aldy. Uıymdastyrýshylardyń aıtýynsha, saltanatty dýmannyń basty maqsaty - jastardy mádenıet pen ónerge baýlı otyryp, mádenı jetistikterdi pash etý bolyp tabylady.

                 

Tuńǵysh ret ótkizilgen merekelik keshtiń bir ereksheligi - kórermender bul kúni «Abaı» jáne «Pýshkınmen» tildesti. Qazaq pen orystyń atyn álemge tanytqan Uly aqyndardyń beınesinde kóptiń kózaıymyna aınalǵan akterlar kórermenniń zor yqylasyna ıe boldy.

   

Keshke elimizdiń tanymal aqyn-jazýshylary, teatr-kıno maıtalmandary jáne Astana qalasynyń óner juldyzdary qonaq bolyp, balda bı bıledi. Ortaǵa shyqqan bı juptary naǵyz ónerdiń úlgisin pash etip, kóptiń qoshemeti men qurmetine ıe boldy. Aqyndar óleńnen shashý shashyp, dástúrli ánshiler qara dombyranyń únimen «Qazaqstan» kontsert zalyn dýmanǵa toltyrdy.

«Kitaphanamyzdy kúnde aıtýly sharalar uıymdastyrylady. Búgin ǵana «Úshqońyr» kitabynyń tusaýkeseri ótip, týyndy birden kóptiń suranysyna ıe boldy. Al osynaý ádebı-sazdy kesh Astana qalasynyń mádenıet salasynyń qyzmetkerlerine arnalyp otyr. Búgin sizder «Abaı» men «Pýshkındi» kezdestirip, kóńildi keshte bı bıleı alasyzdar. Biz ádebıet álemine tereń boılap, halyqqa ul rýhanııatynyń qazynasyn tereńirek pash etkimiz keledi. Arnaıy baletmeısterdi shaqyryp, bı ónerin meńgerýge barymyzdy saldyq. Kópshilikke keshimiz unady senimdemiz», - deıdi Ulttyq akademııalyq kitaphananyń dırektory Úmithan Muńalbaeva.