Astanadaǵy №8 mektep jabylyp qaldy
ASTANA. QazAqparat - Astana qalalyq bilim basqarmasy №8 mekteptiń jabylýyna qatysty túsinikteme berdi, dep habarlaıdy QazAqparat.
«Elordanyń №8 mektebin jabý jáne oqýshylardy taıaý ornalasqan mektepterge bólý týraly sheshimdi Astana qalasynyń bilim basqarmasy tamyz aıynyń basynda qabyldaǵan bolatyn. №8 mektep qaladaǵy eski bilim ordalarynyń biri sanalady. Ol 1962 jyly salynǵan. 2008 jyly Qazaqstan qaıta jańǵyrtý jáne damý kóp beıindi ınstıtýty mektep ǵımaratyna arnaıy saraptama júrgizip, nátıjesinde kúrdeli jóndeý jumystary júrgizilgen edi. 5 jyl ótkennen keıin, 2016 jyly mektep ǵımaratynan jaryqshaq tabyldy», - dep málim etti basqarmadan.
Osydan keıin kóshpeli komıssııa qurylyp, onyń quramyna ákimdiktiń, tótenshe jaǵdaılar departamentiniń, qalalyq bilim basqarmasynyń ókilderi kirgen. Mekteptiń tehnıkalyq jaı-kúıin tekserý jáne baǵalaýǵa qajetti qarjy bólingen.
«Qazirgi ýaqytta №8 mekteptiń oqýshylary taıaý ornalasqan 3 mektepte (№4, 16 jáne 56 mektep) bilim alýda. Atalǵan nysan boıynsha túbegeıli sheshim qabyldaný úshin jer qyrtysy men topyraǵyna tolyqtaı geologııalyq zertteý júrgizilýde. Bilim basqarmasy saraptama qorytyndysyn qosymsha habarlaıtyn bolady», - delingen taratylǵan málimette.
