Astanadaǵy №65 mektep sańyraý jáne estý qabileti tómen balalarǵa arnalǵan zamanaýı júıemen jabdyqtalady
ASTANA. 20 qazan. QazAqparat - Dúısenbi kúni Astana qalasynyń synaqtyq ınklıýzıvti mektebi sheńberinde estý qabileti tómen jáne sańyraý balalar úshin tosqaýylsyz jaǵdaı jasaýynda biregeı tájirıbe usynylady.
«Dara» qaıyrymdylyq qory, Qazaqstan Respýblıkasyndaǵy Fınlıandııa Elshiligi jáne Heılıberı Astana mektebiniń qoldaýymen №65 mekteptiń tórt synyby jalpy somasy 3 mln. teńgeden asatyn zamanaýı qural-caımanmen - FM júıesimen jabdyqtalady.
Danııada óndirilgen FM júıesi týmysynan sańyraý jáne estý qabileti tómen balalar úshin oqý úrdisi ústinde sóz ben dybystardy uǵynýda kedergi bolmaýyn qamtamasyz etedi. Júıe fondyq shýlardy joıady, osylaısha múgedek balalardyń bilim alýyndaǵy qosymsha tosqaýyldar joıylady.
Qural-saımanmen jabdyqtalǵan tórt synyptyń resmı ashylýy «Qazaqstan Respýblıkasyndaǵy ınklıýzıvti bilim berýdiń damý joldary» atty Respýblıkandyq konferentsııa sheńberinde ótedi. Konferentsııanyń uıymdastyrýshysy QR Bilim jáne ǵylym mınıstrliginiń qaramaǵyndaǵy Ulttyq túzetý pedagogıkasynyń ǵylymy-praktıkalyq ortalyǵy.
Atalǵan konferentsııa sheńberinde sarapshylar Qazaqstandaǵy ınklıýzıvti bilim berýdiń praktıkalyq júzege asyrý suraqtary, pedagogıkalyq kadrlardy daıyndaý máselesi, múgedek balalardyń áleýmettený men qosymsha bilim alý múmkindikterin júzege asyrý sekildi suraqtary talqylanady.
