Astanadaǵy №54 mektep-lıtseıine ǵalym A.Seıdimbektiń esimi beriledi
ASTANA. Qyrkúıektiń 11-i. QazAqparat /Arman Asqarov/ - Jaqyn arada Astanadaǵy №54 mektep-lıtseıge belgili ǵalym, etnograf-jazýshy Aqseleý Slanuly Seıdimbektiń esimi beriledi. Bul týraly búgin ǵalymnyń atyndaǵy murajaıdyń ashylý rásiminde osy mekteptiń dırektory Umsyn Nurjigitqyzy málim etti, dep habarlaıdy QazAqparat.
«Búginde elimizge belgili ǵalym, jazýshy, Memlekettik syılyqtyń laýreaty Aqseleý Slanuly Seıdimbektiń esimin Astanadaǵy №54 mektep-lıtseıge berý jónindegi qalalyq máslıhattyń sheshimi bar. Endi, osyǵan baılanysty arnaıy qaýly shyqqannan keıin, bizdiń mektebimizge Aqseleý aǵamyzdyń aty beriledi», - deıdi U.Nurjigitqyzy. Mektep dırektory atap kórsetkendeı, A.Seıdimbek atyndaǵy memorıaldyq murajaıdyń ashylýy osy ıgi istiń bir bastamasy ǵana.
