Astanadaǵy №54 mektep-lıtseıge Aqseleý Seıdimbektiń esimi berilmek
ASTANA. Qazannyń 24-i. QazAqparat /Gúlmıra Álıakparova/ - Astanadaǵy № 54-shi qazaq mektep-lıtseıi kórnekti ǵalym, belgili qaıratker, marqum Aqseleý Seıdimbektiń esimimen atalatyn bolady,
dep habarlaıdy QazAqparat.
«Aqseleý aǵamyz búkil óziniń ómirin, bilimge, ǵylymǵa, halyqtyń múddesine arnaǵan azamat. Sondyqtan onyń esimin máńgilik saqtap qalý maqsatynda №54 mektep-lıtseıdiń pedagogıkalyq ujymy jáne ata-analar qaýymy joǵary organdarǵa ótinish bildirdi. Búginde ótinish Astana qalasy ákimi men qalalyq Onomastıkalyq komıtet tarapynan qoldaý taýyp, másele boıynsha qaýly daıyndalý ústinde», dedi búgin jýrnalısterge bergen suhbatynda mektep-lıtseıdiń dırektory Ǵalııa Syzdyqova.
Ǵ.Syzdyqovanyń aıtýynsha, №54 mektep-lıtseıi Elbasynyń «100 mektep, 100 aýrýhana» baǵdarlamasy boıynsha boı kótergen alǵashqy mektep jáne ol barlyq jaǵynan zamanaýı talaptarǵa sáıkes keledi. «Mundaı iri tulǵanyń esimin arqalaý mektep ujymyna úlken jaýapkershilikti júkteıdi. Bul mindetti oryndaý - Aqseleý aǵamyzdyń aldyndaǵy azamattyq paryzymyz dep bilemiz», deıdi ol.
Mektep-lıtseı aldaǵy ýaqytta óz bazasynda A.Seıdimbektiń murajaıyn ashyp, onyń eńbekterin tereń zertteýdi qolǵa almaq.
Búginde kórnekti qalamger, QR Memlekettik syılyǵynyń laýreaty, professor-ǵalym A.Seıdimbektiń atymen Astana kósheleriniń birin ataý máselesi qarastyrylyp jatyr.
