Astanadaǵy 51-shi avtobýsta «jıhadshyny» ustaý operatsııasy: kondýktor oqıǵanyń mán-jaıyn aıtyp berdi
ASTANA. QazAqparat - Ótken aptanyń sońynda astanalyqtar Mınıstrlikter úıi aldyndaǵy «jıhadshyny» ustaý operatsııasyna kýá boldy.
Jol-patrýldik polıtsııanyń birneshe kóligi 51-shi baǵyttaǵy avtobýsty toqtatyp, barlyq jolaýshylardy tekserip shyqty. Saqaly bar bir adamdy da ustady. Alaıda «avtobýsta brondy keýdeshe men chemodan ustaǵan bir jankeshti bar» degen shuǵyl aqparat rastalǵan joq. Avtobýstyń kondýktory «QazAqparat» tilshisine osy oqıǵanyń mán-jaıyn aıtyp berdi.
«Ol adamnyń ústinde eshqandaı brondy keýdeshe bolǵan joq. Men ózim kórdim ǵoı. Tolyqtaý kelgen úlken kisi. Anaý beli aýratyn kisiler kıetin beldik bar emes pe? Sony kıip alǵan edi. Al qolynda chemodan emes, kádimgideı noýtbýk salatyn sómke boldy. Іshi tolǵan qaǵaz. Sol adamdy kórgen bir jas jigit polıtsııaǵa zvondap, avtobýsta terrorıst bar dep aıtqan ǵoı. Sonda ózi Han Shatyr jaqtan minip, jańaǵy kisiden qoryqqannan keıin Ana men bala ortalyǵynan túsip qalǵan. Aıaldamada turyp, avtobýstyń baǵyty men nómirin aıtqan eken», - deıdi M.Áshirbaı.
Onyń aıtýynsha, avtobýsty Mınıstrlikter úıi mańaıynda toqtatqannan keıin tártip saqshylary «jıhadshy» degen kisini jáne saqaly bar taǵy bir adamdy ustady. «Ulty túrikke uqsaıdy. Ol baıǵus «Nur Astana» meshiti jaqtan mingen. Polıtsııa ony da keshke deıin ustap tergedi. Bizdi Mınıstrlikter úıinen ary qaraı kópir jaqqa alyp ketti de, avtobýstyń syrtqy, tipti ishki qaptamalaryn sheship, ıtterdiń kómegimen tolyǵymen tekserdi. Sóıtip, bizdi de keshke deıin ustady. Anaý zvondaǵan jas jigitti de alyp keldi. Oı, jynym keldi. Úlken kisige qarama-qarsy otyrǵan eken. Sodan beldigin bronejılet dep, noýtbýktyń sómkesin chemodan dep, baıbalam salǵan ǵoı», - dedi avtobýstyń kondýktory.
Al «ol adam jolda kele jatyp, namaz oqyǵan» degen sybys shyndyqqa janaspaıdy. Sebebi «terrorıst» dep ustalǵan kisi birden namaz oqymaıtynyn jetkizgen.
Sol kúni avtobýstyń júrgizýshisi men kondýktory bir kúndik nápaqasynan aıyryldy. Shyǵyndy zvondaǵan jigitten óndirip alaıyn dese, ol: «Men seziktendim, kúdiktengennen keıin polıtsııaǵa zvondadym», - dep aqtaldy. Tártip saqshylary da bul máseleni ary qaraı qazbalaǵan joq. Oǵan qosa, 51-shi marshrýttar qaraıtyn 4-shi avtobýs parki baǵyttan shyǵyp ketkeni úshin aıyppul saldy. Іshki ister organdarynyń tekserisin qulaqqa da ilmedi. Avtobýs jalǵa berilgennen keıin shtattan tys jaǵdaılar eskerilmeıtinin jetkizgen.
