Astanadaǵy №38 mektep-lıtseıi QR Tuńǵysh Prezıdenti kúnin atap ótti
ASTANA. 27 qarasha. QazAqparat - Búgin Astanadaǵy №38 mektep-lıtseıinde 1 jeltoqsan - QR Tuńǵysh Prezıdenti kúnine arnalǵan «Kemel bilim, kemeńger Elbasy - jarqyn bolashaq kepili» atty is-shara bastaldy.
Onyń aıasynda Eýrazııa ulttyq ýnıversıtetiniń ǵalymdary - Jabaıhan Ábdildın, Seıit Qasqabasov, Muhtarbaı Ótelbaı, Dıhan Qamzabekuly jáne basqa da tanymal qoǵam qaıratkerleri mektep oqýshylary úshin sheberlik synyptaryn ótkizip, qazaqtaný, danalyq negizderi, Abaıtaný jáne qazirgi qazaq ádebıeti syndy taqyryptar boıynsha dárister oqıtyn bolady. Mektep dırektory Jamal Qasymbektiń aıtýynsha, atalǵan is-shara osydan úsh jyl buryn mektep pen ýnıversıtet arasynda rásimdelgen arnaıy memorandým aıasynda jyl saıyn uıymdastyrylyp otyrady. Bıyl ony QR Tuńǵysh Prezıdenti kúnine oraılastyrý sheshimi qabyldandy.
«Ǵylym men bilim egiz uǵym. Birinen-biri bastaý alyp, bir-birimen sabaqtasyp otyrady. Bilimsiz ǵylym, ǵylymsyz bilim joq. Bizdińshe, Astanadaǵy №38 mektep-lıtseıi eń úlgili ári zaman aǵymymen aıaǵyn qatar basyp kele jatqan bilim ordasy bolyp sanalady. Óıtkeni onyń túlekteri búginde beldi ýnıversıtetterge túsip, joǵary jetistikterge jetýde. Sol sebepti biz onyń qazirgi deńgeıin odan da joǵaryǵa kóterýge múddelimiz», - deıdi Eýrazııa ulttyq ýnıversıtetiniń prorektory Dıhan Qamzabekuly.
