Astanadaǵy №2 kópsalaly aýrýhana býhgalteri 32 mln teńgeni jymqyrǵany úshin sottaldy

ASTANA. QazAqparat – Búgin Astana qalasynyń qylmystyq ister jónindegi aýdanaralyq soty №2 qalalyq qalalyq kópsalaly aýrýhanananyń býhgalter-kassırine 32 mln teńge jymqyrǵany úshin shartty jaza taǵaıyndady, dep habarlaıdy QazAqparat.

Qalalyq sottyń resmı saıtyndaǵy málimette úkimge negiz bolǵan qylmystyq áreketti «senip tapsyrylǵan múlikti ıemdený jáne rásýa etý» (Qylmystyq kodekstiń 189-baby, 4-bóliginiń, 2 tarmaǵy) dep sıpattaıdy. Sondaı-aq, mundaı qylmystyń «jemqorlyq» sanatyna jatpaıtyny aıtylǵan.

Sottalýshyǵa 01.01. 2021 j. – 29.11.2022 j. aralyǵynda qyzmet babyn paıdalanyp, senip tapsyrylǵan múlikti ıemdený jáne rásýa etý arqyly kásiporynnyń 32 mln teńgesin jymqyrdy degen aıyp taǵylǵan.

Sýdıa zardap shekken tarap ókili men aýdıtorlyq eseptiń, kiris-kassalyq orderdiń keltirgen málimetteri kúdiktiniń kinásin dáleldeıdi degen sheshim qabyldady.

Degenmen, býhgalterdiń óz kinásin moıyndaǵanyn, jasaǵan áreketine ókinetinin, kelgen shyǵyndy tolyq kólemde jáne erkimen qaıtarǵanyn, jasy 27-de ǵana bolýyn, qylmystyq jaýapqa alǵash ret tartylyp otyrǵanyn eskerip, jazasyn jeńildetti.

«Sot úkimimen A. Qylmystyq kodekstiń 189-baby, 4-bóliginiń 2-tarmaǵynda kórsetilgen qylmysty jasaǵany úshin kináli dep tanylyp, 7 jyl bas bostandyǵynan aıyryldy. Materıaldyq jaýapkershilik júkteıtin qyzmetpen aınalysý quqyǵyna 10 jyl shekteý qoıylady.

Qylmystyq kodekstiń 63-baby boıynsha jaza shartty túrde taǵaıyndaldy. Sottalýshy úkim merziminiń ón boıynda probatsııalyq qadaǵalaýda bolady. Úkim áli kúshine engen joq», - delingen qalalyq sottyń resmı saıtynda.