Astanadaǵy júrgizýshisiz LRT poıyzdary qalaı jumys isteıdi
ASTANA. KAZINFORM – Astanadaǵy LRT poıyzdary avtomatty rejımde qatynaıdy. Ár quramda arnaıy operator bolady. Bul týraly City Transportation Systems ókilderi málimdedi.
CTS basqarma tóraǵasy Asylbek Dúısebaevtyń aıtýynsha, poıyzdar júrgizýshisiz júrgenimen, ár quram ishinde operator turaqty túrde bolady.
— Mashınıst poıyz ishinde bolady, biraq ony júrgizbeıdi. Ol tek tótenshe jaǵdaı týyndaǵan jaǵdaıda basqarýdy óz qolyna alady. Sonymen qatar jolaýshylarǵa baǵyt-baǵdar berip, qajet kezde kómektesedi, — dedi ol LRT ınfraqurylymyna arnalǵan baspasóz týry barysynda.
LRT poıyzynyń operatory Erjan Sadyrbaev barlyq operatordyń temirjol salasynda keminde 10 jyl eńbek ótili bar ekenin aıtty.
Onyń sózinshe, poıyzdarda jolaýshylarǵa arnalǵan arnaıy toqtatý tetigi qarastyrylmaǵan.
— Arnaıy batyrma tek basqarý pýltiniń astynda ornalasqan. Ol poıyzdy júrgizgen kezde ǵana paıdalanylady. Biz ratsııa arqyly dıspetcherlik ortalyqqa birden habar beremiz. Qajet bolǵan jaǵdaıda barlyq poıyz toqtatylady, — dedi ol.
Stantsııalar men poıyzdardaǵy qaýipsizdik kameralar men datchıkter arqyly baqylanady. Olardyń barlyǵy Ushqyshsyz poıyzdardy basqarý ortalyǵyna qosylǵan.
Ortalyqtaǵy dıspetcherler poıyz qozǵalysyn naqty ýaqyt rejıminde baqylap otyrady. Sonymen qatar mamandar kólikke qatysty oqıǵalardy saralap, zańbuzýshylyqtardy foto men vıdeoǵa tirkeıdi. Budan bólek, marshrýttyq avtobýstardyń dıspetcherlik qyzmeti men halyqty aqparattandyrý júıesiniń jumysyn úılestiredi.
LRT qozǵalys dıspetcheri Medet Altynbektiń aıtýynsha, ár stantsııada kezekshi qyzmetkerler bolady.
— Eger stantsııada qandaı da bir tótenshe jaǵdaı bolsa, onyń bári kameralar arqyly baqylanady. Biz kez kelgen poıyz ben stantsııany ár buryshtan kóre alamyz, — dedi ol.
Onyń aıtýynsha, kúrdeli jaǵdaı týyndasa, poıyz jaqyn stantsııaǵa deıin jetkizilip, sol jerde jolaýshylarǵa jedel kómek kórsetiledi.
— Eger esik jabylmaı qalsa nemese bireý qysylyp qalsa, júıe ony datchıkter arqyly birden anyqtaıdy, — dedi ol.
Jeńil relsti kólik jelisi úshin barlyǵy 19 poıyz qarastyrylǵan. Onyń 15-i kúndelikti baǵytqa shyǵady, al 4-eýi rezervte bolady.
Poıyzdardyń paıdalaný jyldamdyǵy saǵatyna 60 shaqyrym. Al eń joǵary jyldamdyǵy saǵatyna 80 shaqyrymǵa deıin jetedi. Ár poıyzda 148 otyratyn oryn bar. 4 bólikten turatyn quramdar tolyq tolǵan kezde 600-den astam jolaýshyny tasymaldaı alady.
Eske salsaq, LRT jolaýshylar úshin 16–17 mamyrda ashylady. Kólik kún saıyn saǵat 06:00-den 23:00-ge deıin qatynaıdy. Operatordyń baǵalaýynsha, joba iske qosylǵan alǵashqy kezeńde táýligine 25 myńnan 45 myńǵa deıin jolaýshy tasymaldanady.
