Astanadaǵy jumys kestesin ózgertý keptelis máselesin sheshti me — ákimniń jaýaby

ASTANA. KAZINFORM – Astanada Nura aýdanynyń turǵyndarymen kezdesýde qala ákimi Jeńis Qasymbekten «Jańa jumys kestesine kóshý elordadaǵy keptelisti azaıtýǵa kómektesti me?» degen suraq qoıyldy.

Ákimniń aıtýynsha, jańa rejımge kóshý is júzinde qazan aıynan bastaldy.

– Jańa jumys kestesine kóshý qyrkúıekten emes, 1 qazannan bastaldy jáne 15 kúnnen keıin ǵana aıaqtalady. Barlyq memlekettik organ tańǵy 8-den bastalatyn jumys tártibine aýysady, - dep túsindirdi Jeńis Qasymbek. 

Aıtýynsha, keıbir vedomstvolar burynǵy keste boıynsha jumysyn jalǵastyryp jatyr.

– Quqyq qorǵaý organdary, memlekettik organdar, Syrtqy ister mınıstrligi jáne keıbir arnaıy organdar, ulttyq kompanııalardan «QazMunaıGaz», «Qazaqstan temir joly», sonymen qatar «Samuryq-Qazyna» bas keńsesiniń ózi eski rejımde jumys isteıdi, - dep naqtylady ol.

Ákimniń aıtýynsha, qalanyń kommýnaldyq kásiporyndary táýlik boıy jumys isteıdi. Alaıda keńse bólimi resmı túrde 7:30-dan bastalady. Qala ákimdigi jumysy da resmı túrde tańǵy 7:30-dan bastalady, biraq qyzmetkerlerdiń kópshiligi jumys kúnin tańǵy 7-den bastaıdy.

Ákim túpkilikti qorytyndy jasaýǵa áli erte ekenin jáne ótpeli kezeńniń nátıjesin kútý keregin atap ótti.

– Bizge ýaqyt berseńizder. Biz qarasha aıynda osy jumys rejımine birtindep ótemiz. Bir kúnde bárin májbúrleı almaımyz. Memlekettik organdarǵa bir jarym aı boıy birqalypty rejımge beıimdelýge múmkindik berildi, óıtkeni olarda óńirlerde jumys isteıtin departamentter, basqarmalar bar, sonymen qatar kommýnıkatsııa, erekshe jaǵdaılar bolady, - dep atap ótti Jeńis Qasymbek.

Onyń aıtýynsha, aldyn ala nátıje qarasha aıynyń sońyna deıin belgili bolady.

Buǵan deıin Astana ákimi otstavkaǵa ketýi jaıly qaýesetti joqqa shyǵarǵan bolatyn.