Astanadaǵy jeti joldyń qıylysynda baǵdarshamnyń jumysy ózgerdi
ASTANA. KAZINFORM — Jyl basynan beri Astanada 1700-den astam jol-kólik oqıǵasy tirkelgen. Bul týraly Astana qalasynyń Polıtsııa departamenti málim etti.
Polıtseıler jol-kólik oqıǵalarynyń aldyn alý jáne jol qozǵalysy qaýipsizdigin qamtamasyz etý boıynsha júıeli jumys júrgizip jatyr. «Qaýipsiz jol» jedel-profılaktıkalyq is-sharasyn ótkizý barysynda Astana qalasy Polıtsııa departamentiniń bastyǵy Marat Tólebaev kóshe-jol jelisiniń apatty ýchaskelerin tekserdi.
Іs-shara ótkizý kezinde 2453 jol júrisi qaǵıdasyn buzý deregi anyqtaldy, onyń 131-ine júk kólikteriniń júrgizýshileri kináli ekeni belgili boldy.
«Zań men tártip» qaǵıdaty aıasynda polıtseıler jol jaǵdaıyna táýlik boıy monıtorıng júrgizedi. Ol úshin kóshe beınekameralary, smart-jetondar, avtopatrýlderdegi kameralar sııaqty keshendi quraldar paıdalanylady.
Biryńǵaı drondar ınfraqurylymyna» erekshe nazar aýdarylǵan, onyń aıasynda jol qozǵalysyn áýeden baqylaý uıymdastyrylady.
— 2020–2024 jyldar aralyǵynda aınalma joldyń — Qaraǵandy tasjolynan Kókshetaý tasjolyna deıingi ýchaskesinde 89 jol — kólik oqıǵasy tirkelse, kesirinen 16 adam qaza taýyp, 102 adam jaraqat alǵan. Atalǵan ýchaske Almaty — Ekaterınbýrg halyqaralyq tranzıttik baǵytynyń bóligi bolyp tabylady. Jol — kólik oqıǵalary kóbine qarsy baǵytqa shyǵý, qaýipti manevr jasaý jáne jyldamdyq rejımin arttyrý saldarynan bolǵan. Qaýipsizdikti arttyrý maqsatynda tutas jolaqtyń uzyndyǵy ulǵaıtyldy, jyldamdyqty tómendetý belgileri ornatyldy, «Sergek» kameralary engizildi, sondaı-aq belgilengen jyldamdyqty shamadan tys asyrǵandardy tirkeıtin «Ekın — Patrýl» ekıpajdary jumysy jolǵa qoıyldy. Qabyldanǵan sharalar nátıjesinde — 2025 jyly osy ýchaskede adam ólimimen aıaqtalǵan jol — kólik oqıǵasy tirkelgen joq, — dedi Marat Tólebaev.
Bıyl sondaı-aq jeti jol qıylysynda baǵdarshamdardyń jumys rejımi ózgertildi. Apattyq jaǵdaılar taldaýyna sáıkes, túzetýler engizilgennen keıin jol-kólik oqıǵalarynyń sany qysqaryp, ótkizý qabileti artqan.
Endi barlyq baǵyt úshin qyzyl sıgnal 4 sekýndqa bir mezgilde qosylady. Bul manevrdi qaýipsiz aıaqtap, qıylysty tolyq bosatýǵa múmkindik beredi. Sonyń bir mysaly — Qaramendy bı Shaqauly kóshesi men Zemlıanıchnaıa kóshesiniń qıylysy. Ózgerister engizilgenge deıin bul jerde 28 JKO (negizinen solǵa burylǵan kezde qarsy baǵyttaǵy kólikpen soqtyǵysý) tirkelgen. Baǵdarsham rejımi túzetilgennen keıin mundaı apattar baıqalmaıdy.
Árbir jol-kólik oqıǵasy jeke taldanady, joldardyń parametrleri men jaǵdaılary zertteledi, sodan keıin jol ınfraqurylymyna tıisti túzetýler engiziledi. Sondaı-aq osyndaı oqıǵalardyń aldyn alý úshin, tek apat bolǵan oryndarda ǵana emes, qalanyń basqa kóshelerinde de zamanaýı tehnıkalyq keshender arqyly quqyqbuzýshylyqtardy ákimshilendirý kúsheıtiledi. Astana polıtsııasy jol qozǵalysy erejelerin saqtaý — ózińizdiń ári aınalańyzdaǵy adamdardyń qaýipsizdiginiń kepili ekenin eske salady.
Buǵan deıin jol qozǵalysy erejelerine ózgerister men tolyqtyrýlar engizilip, olar bıylǵy 23 qarashadan bastap kúshine endi.