Astanadaǵy jeke klınıkada áıel kóz jumdy: tekseris bastaldy

ASTANA. KAZINFORM — Osy jyldyń 14 qyrkúıeginde elordadaǵy Green Clinic jekemenshik klınıkasynda 67 jastaǵy Orazgúl Jumaǵalıeva otadan keıin kóz jumdy. Osydan keıin marqumnyń qyzy áleýettik jelide atalǵan klınıka dárigerleriniń nemquraıdy qaraǵanyn jazdy. 

Qyzynyń aıtýynsha, 10 qyrkúıekte Orazgúl Jumaǵalıeva lazerlik ota jasatý úshin klınıkaǵa barǵan. Kelesi kúni dárigerler oǵan tor endoprotezin ornatý arqyly laparoskopııalyq gernıoplastıka jasaǵan. Otadan keıin áıel tek tústen keıin esin jıǵan.

— Biraq 12 qyrkúıekte sumdyq bastaldy. Tústen keıin ápkem anamnan kelgen daýystyq habarlamany topqa jiberdi. Anam áreń sóılep, óte álsiz boldy. Sol kúni keshke qatty qusa bastady. Men keshki 8–9 shamasynda kelgenimde ony jansaqtaý bólimine alyp ketipti, — deıdi qyzy.

Kelesi kúni ol klınıkaǵa qaıtadan barǵan.

— Senbi bolatyn jáne klınıkada birde-bir dáriger bolmady. Kúzetshi men medbıkeler arqyly anamnyń jaǵdaıyn bilýge tyrystyq. Bizge: «Ol jaqsy, jańa ǵana tamaqtandy, ýaıymdamańyzdar» dedi. Keıin bilsek, medbıkeler bizge ótirik aıtypty. Olar anamnyń jaǵdaıy jaqsy dep sendirdi. Biraq shyndyǵynda sol sátte anam azappen jan tapsyryp jatqan eken, — deıdi ol.

Sol kúni keshke áıelge qaıta ota jasalǵan. Іshin ashqanda dárigerler ishektiń 80 paıyzy qaraıyp ketkenin anyqtaǵan. Otaǵa jaýapty dáriger Qaırat Katrenov Almatyǵa ketkendikten, onyń ornyna dáriger Ádilet Mendibaev operatsııa jasaǵan. Túnde otbasy áıeldiń qaıtys bolǵanyn estigen.

Qyzynyń aıtýynsha, sot-medıtsınalyq saraptama qorytyndysynda marqumǵa ekinshi ota jasalǵany kórsetilmegen.

— Olar jaı ǵana: «Otadan keıin qaıtys boldy» dep jazǵan. Adam týraly emes, eseptegi bir jol ispetti. Qorytyndyny anam ózinen-ózi aýyrǵannan kóz jumǵandaı etip jazǵan. Biraq ol aýyrmaǵan. Al mátinniń jartysy múlde basqa adamǵa qatysty — boıy, salmaǵy, shashynyń túsi sáıkes kelmeıdi. Túsinesiz be? Olar basqa adamnyń qorytyndysyn onyń isine qosqan. Bul jaı qatelik emes, bul — qoldan jasalǵan jalǵandyq. Aqsha úshin ótirik! Al buǵan kim jaýap berdi? Eshkim, — deıdi qyzy.

Green Clinic ókilderi de qaıǵyly jaıtqa qatysty pikir bildirdi. Olardyń málimetinshe, patsıenttiń uly R.Uraqbaıdyń ótinishi klınıkaǵa 16 qazanda túsken. Al 17 qazanda ol Medpýlǵa (Biryńǵaı saqtandyrý pýly) tirkelgen. Sonymen qatar, Astananyń saraptamasy ortalyǵynda sot-medıtsınalyq saraptama júrgizilgen. Klınıkada da ishki tergeý bolyp, táýelsiz sarapshylar komıssııasy qurylǵan. Ol 5 qarashada jumysyna kirisedi. Komıssııa jumysqa kirisken sátten bastap 5 jumys kúniniń ishinde táýelsiz sarapshylyq qorytyndy daıyn bolady. Qorytyndyny alǵannan keıin eki jumys kúni ishinde klınıka ony marqumnyń týystaryna jáne Biryńǵaı saqtandyrý pýlyna qatysýshy saqtandyrý uıymyna jiberedi.

Green Clinic «Halyq densaýlyǵy jáne densaýlyq saqtaý júıesi týraly» kodeksiniń 273-babyna sáıkes, patsıenttiń densaýlyq jaǵdaıy, dıagnozy jáne emi týraly aqparat dárigerlik qupııa bolyp sanalatynyn atap ótedi.

— Kásibı ádep normalary men QR zańnamasynyń jeke derekterdi jáne dárigerlik qupııany qorǵaý talaptaryn saqtaýǵa, sondaı-aq tergeý nátıjeleri boıynsha resmı habarlamany kútýge shaqyramyz. Biz marqumnyń týǵan-týystaryna qaıǵyryp kóńil aıtamyz jáne osy jaǵdaıǵa túsinistikpen qaraǵandary úshin alǵys bildiremiz, — delingen klınıka málimdemesinde. 

Aıta ketelik Mańǵystaýda jekemenshik emshara kabınetterinde eki adam kóz jumǵan edi.