Astanadaǵy jedel shaqyrý júıesi tıimdiligin dáleldedi
ASTANA. KAZINFORM — Astana qalasynda turǵyndar men qala qonaqtarynyń qaýipsizdigin qamtamasyz etý maqsatynda 40 «SOS» jedel shaqyrý batyrmasy ornatylyp, táýlik boıy úzdiksiz jumys istep tur. Bul týraly Polisia.kz jazdy.
Atalǵan batyrmalar adam kóp shoǵyrlanatyn oryndarda, atap aıtqanda temirjol vokzaldary, bazarlar men qalalyq saıabaqtar aýmaǵynda ornalasqan. Bul ınfraqurylym tótenshe jaǵdaı týyndaǵan sátte azamattarǵa polıtsııadan jedel ári qoljetimdi túrde kómek suraýǵa múmkindik beredi.
— Jyl basynan beri «SOS» batyrmalary arqyly polıtsııaǵa 9 ótinish kelip túsken. Barlyq habarlamalar boıynsha tártip saqshylary jedel áreket etip, oqıǵa oryndaryna der kezinde jetip, tıisti tekserý jumystaryn júrgizgen. Máselen, keshki ýaqytta Qabanbaı batyr dańǵyly boıyndaǵy saýda-oıyn-saýyq ortalyqtarynyń mańynda kúdikti tulǵalardyń júrgeni týraly habarlama tirkelgen, — dep habarlady quzyrly organnan.
Oqıǵa ornyna jedel jetken polıtsııa qyzmetkerleri aýmaqty tekserip, mán-jaıdy anyqtaý úshin qajetti sharalardy qabyldady. Polıtsııa turǵyndardy saqtyq sharalaryn saqtaýǵa jáne kúmándi jaǵdaılar týyndaǵan kezde «SOS» batyrmasyn nemese «102» arnasyn paıdalanýǵa shaqyrady.
Buǵan deıin Shymkentte SOS batyrmalary kóbeıgenin jazdyq.
