Astanadaǵy jármeńkege Túrkistan oblysynyń sharýalary 600 tonnadan astam ónim ákeldi

ASTANA. KAZINFORM — Astanada dástúrli aýyl sharýashylyǵy jármeńkeleriniń maýsymy bastaldy. Olar 30 tamyz ben 26 qazan aralyǵynda ár demalys kúnderi ótkiziledi. Alǵashqylardyń biri bolyp elordaǵa Túrkistan oblysynyń agrarııleri óz ónimderin alyp keldi, dep habarlaıdy qala ákimdiginiń resmı saıty.

Jyl saıynǵy jármeńkelerge elimizdiń 17 óńiriniń aýyl sharýashylyǵy taýaryn óndirýshileri qatysady. Maýsymdy Túrkistan oblysynyń fermerleri ashyp, elordaǵa 600 tonnadan astam ónim jetkizdi. Onyń ishinde 200 tonna kókónis, 100 tonna et jáne et ónimderi, 100 tonna sút ónimderi, 80 tonna baqsha ónimderi, 50 tonna jemis-jıdek, 19 tonna balyq, 12 myń dana jumyrtqa jáne 60 tonnadan astam basqa da azyq-túlik ónimderi bar. Baǵalar naryqtan 10-15 paıyzǵa tómen.

Jármeńke qaqpasynda qonaqtardy Qazaqstannyń úlken kartasy men ulttyq aspaptarda oınaǵan mýzykanttar qarsy aldy. Saýda qatarlarynda azyq-túlikpen qatar keramıka buıymdary men toqyma ónimderi de usynyldy.

«Biz Túrkistan oblysynan, negizinen Asyqata, Mankent jáne Qarabaý aýyldarynan keldik. Bul jerler mal sharýashylyǵymen tanymal. Jármeńkege jylqy etin kılogramyna 1100 teńgeden, sıyr etin 3300 teńgeden alyp keldim. Bizde bordaqylaý dástúrli ádispen júredi: aldymen jylqylar jaıylymda baǵylady, keıin olardy fermaǵa ákelip, alty aıǵa deıin ustaımyz. Azyǵy – dándi daqyldardan qurastyrylǵan, teńgerimdi. Sondyqtan eti tyǵyz ári dámdi bolady. Negizinen bul – bizdiń klımatqa jaqsy beıimdelgen jergilikti qazaqy jylqylar», – dedi fermer Danııar óz ónimderi jaıly.

Ár demalys kúnderi elordaǵa ózge óńirlerdiń agrarııleri keledi:

• 6-7 qyrkúıek – Jambyl jáne Ulytaý oblystary;
• 13-14 qyrkúıek – Qyzylorda jáne Aqtóbe oblystary;
• 20-21 qyrkúıek – Abaı jáne Atyraý oblystary;
• 27-28 qyrkúıek – Almaty, Jetisý jáne Mańǵystaý oblystary;
• 4-5 qazan – Batys Qazaqstan jáne Qostanaı oblystary;
• 11-12 qazan – Qaraǵandy jáne Shyǵys Qazaqstan oblystary;
• 18-19 qazan – Pavlodar jáne Soltústik Qazaqstan oblystary;
• 25-26 qazan – Aqmola oblysy.

Jalpy osy óńirlerdiń aýyl sharýashylyǵy taýar óndirýshileri 10 myń tonnadan astam ónim satýdy josparlap otyr.Aıta keteıik, bıylǵy jármeńke Qarqaraly tasjoly, 1 mekenjaıynda (qalalyq «Qazanat» ıppodromynyń qarsy betinde) ótip jatyr. Qala turǵyndary men qonaqtarynyń yńǵaılylyǵy úshin №18, №37 jáne №303 avtobýs baǵyttary qatynaıdy.

Aıta keteıik, buǵan deıin Astanada tájikstandyq ónimder men buıymdardyń jármeńkesi ótken bolatyn.