Astanadaǵy jármeńkede Jambyl kreatorlary 8,6 mln teńge tabys tapty
ASTANA. KAZINFORM — Astanada Jambyl oblysynyń kreatorlary jármeńkeniń alǵashqy kúninde 8,6 mln teńgeniń ónimin satty. «Asqaq rýhty Áýlıeata» jármeńkesine 3500-ge jýyq adam kelip, óńirdiń qolóner, óner jáne zamanaýı kreatıvti jobalarymen tanysty. Bul týraly Mádenıet jáne aqparat mınıstrligi málim etti.
Astanadaǵy Qazaq Creative Hub alańynda Jambyl oblysynyń «Asqaq rýhty Áýlıeata» kreatıvti jármeńkesi ashyldy. Іs-shara Mádenıet jáne aqparat mınıstrliginiń qoldaýymen «Kreatıvti ındýstrııalardy damytý qory» korporatıvtik qory uıymdastyrǵan respýblıkalyq Creative Aimaq jobasy aıasynda ótip jatyr.
Jármeńkede dástúrli qolóner buıymdary, óńirdiń avtorlyq brendteri, zamanaýı tehnologııalar jáne kreatıvti ındýstrııa salasyndaǵy jobalar tanystyryldy.
Jergilikti qolónershilerdiń týyndylary da kópshilikke usynyldy. Qolóner zalynda kıizden, aǵash pen bylǵarydan jasalǵan buıymdar, ulttyq naqyshtaǵy zergerlik áshekeıler jáne kádesyılar qoıylǵan. Sondaı-aq kópshilik ulttyq kıimderdi satyp ala alady.
Jármeńkede óńirdiń ádebı murasy, beıneleý jáne fotoóneri tanystyryldy. Jambyl oblystyq kózi kórmeıtin jáne álsiz kóretin azamattar kitaphanasy «Altyn qor» tsıfrlyq kitabyn, tórt formatta ázirlengen ınklıýzıvti ertegi kitaptaryn jáne 3D tehnologııalar negizinde jasalǵan taktıldi maketterdi jármeńkege qoıdy. Budan bólek, jergilikti baspalardyń kitaptary, sýretshilerdiń kartınalary, músinder men fototýyndylar boldy.
Ulttyq mádenıet pen bilimdi zamanaýı tsıfrlyq tehnologııalarmen sabaqtastyrǵan IT-jobalar da aıryqsha oryn aldy. Olardyń qatarynda jasandy ıntellekt qoldanylatyn zııatkerlik jáne áleýmettik keńistikter, jastarǵa mamandyq tańdaýǵa kómektesetin tsıfrlyq júıeler, sondaı-aq tarıhı-mádenı murany ınteraktıvti tsıfrlyq formatta tanytatyn jobalar bar.
Sonymen qatar elorda turǵyndary men qonaqtary jasandy ıntellekt kómegimen ázirlengen qazaq ertegileri men anımatsııalyq fılmderdi tamashalaı alady.
Jármeńkeniń alǵashqy kúnine 3500 adam keldi. Kreatorlar 8,6 mln teńgeniń ónimin satty.
Eske sala keteıik, buǵan deıin Astanada Almaty oblysynyń kreatıvti jármeńkesi ótip, oǵan myńdaǵan adam qatysty.
