Astanadaǵy jármeńkede ShQO men Qaraǵandynyń 700 tonnadan asa ónimi usynylady

ASTANA. KAZINFORM — Astanada 11-12 qazan kúnderi Qaraǵandy jáne Shyǵys Qazaqstan oblystarynyń taýar óndirýshileriniń qatysýymen kezekti óńirlik aýyl sharýashylyǵy jármeńkesi ótedi, dep habarlaıdy elorda ákimdiginiń resmı saıty.

Jármeńkede atalǵan óńirlerdiń agrarııleri et, balyq, sút, bakaleıa jáne kókónis, jemis ónimderiniń keń tańdaýyn usynady. Barlyq ónim fermerlerden tikeleı jetkiziledi, bul — azyq-túlik qoljetimdiligin arttyryp, otandyq óndirýshilerdi qoldaýǵa múmkindik beredi.

— Eki oblystyń aýyl sharýashylyǵy taýar óndirýshileri Astanaǵa jalpy kólemi 700 tonnadan astam ónim ákeledi. Onyń ishinde 390 tonna kókónis, 170 tonna et pen et ónimderi, 160 myń jumyrtqa, 70 tonna bal, 30 tonna sút ónimderi, 16 tonna ósimdik maıy, 14 tonna balyq, shamamen 10 tonna ózge de azyq-túlik ónimderi bar, — delingen habarlamada.

Elorda turǵyndary men qonaqtary óńirlerdiń shyǵarmashylyq ujymdarynyń qatysýymen ótetin kontserttik baǵdarlamany da tamashalaı alady. Jármeńke 9:00–den 18:00–ge deıin jumys isteıdi.

Aıta keteıik, bıylǵy jármeńkeler «Qazanat» ıppodromynyń avtoturaǵy aýmaǵynda, Qarqaraly tasjoly, 1 mekenjaıynda ótkizilip keledi. Sondaı-aq qala turǵyndarynyń jáne qonaqtarynyń yńǵaılylyǵy úshin jármeńke ótetin orynǵa № 18, 37 jáne 303 baǵyttaǵy avtobýstar qatynaıdy.

Budan buryn Astanadaǵy jármeńkege BQO men Qostanaı 500 tonnaǵa jýyq ónim ákeletini habarlandy.