Astanadaǵy jármeńkede fermerler 400 tonnadan astam ónim usyndy

ASTANA. KAZINFORM - 20-21 qyrkúıek kúnderi Astanada Abaı jáne Atyraý oblystarynyń taýar óndirýshileriniń kezekti óńirlik aýyl sharýashylyǵy jármeńkesi ótip jatyr, dep habarlaıdy QR Saýda jáne ónerkásip mınıstrliginiń baspasóz qyzmeti. 

Jármeńkede Abaı jáne Atyraý oblystarynyń aýyl sharýashylyǵy taýar óndirýshileri et, balyq, sút ónimderi, bakaleıa, kókónis pen jemis-jıdekter syndy ártúrli ónimderdi tikeleı fermerlerden usynady. Bul óz kezeginde azyq-túliktiń qoljetimdiligin arttyryp, otandyq óndirýshilerdi qoldaýǵa septigin tıgizedi. 

Atap aıtqanda, óńirlik taýar óndirýshiler shamamen 400 tonna ónim ákelgen. Onyń ishinde 140 tonna et jáne et ónimderi, 80 tonna kókónis pen jemis-jıdek, 70 tonna bal, 50 tonna baqsha ónimderi, 25 tonna balyq, 15 tonna sút ónimderi jáne shamamen 20 tonna ózge de azyq-túlik ónimderi bar.

Sonymen qatar elorda turǵyndary men qonaqtary ónimderdi fermerlerden tikeleı satyp alyp qana qoımaı, óńirlik shyǵarmashylyq ujymdardyń qatysýymen ótetin kontserttik baǵdarlamany tamashalaı alady. Jármeńke saǵat 9:00-den 18:00-ge deıin jumys isteıdi.

Aıta keteıik, bıylǵy jyly jármeńke Qarqaraly tas joly, 1 mekenjaıy boıynsha ornalasqan «Qazanat» ıppodromynyń avtoturaǵynda ótýde. Sondaı-aq, jármeńke kúnderi elorda turǵyndary men qonaqtarynyń yńǵaılylyǵy úshin №18, 37 jáne 303 baǵytyndaǵy avtobýstar qatynaýda, bul is-shara ótetin orynǵa qolaıly jetýge múmkindik beredi.

Buǵan deıin elordadaǵy jármeńkede Abaı men Atyraý oblystarynyń 400 tonna ónimi usynylatynyn jazǵan edik.