Astanadaǵy jármeńkede Abaı men Atyraý oblystarynyń 400 tonna ónimi usynylady

ASTANA. KAZINFORM — Astanada ótetin jármeńkede Abaı men Atyraý oblystarynan jetkizilgen 400 tonnadan astam aýyl sharýashylyǵy ónimderi satylady, dep habarlaıdy elorda ákimdiginiń resmı saıty.

Astanada aldaǵy óńirlik aýyl sharýashylyǵy jármeńkesi 20-21 qyrkúıek kúnderi ótedi.

Bıyl óz ónimderin Abaı men Atyraý oblystarynyń taýar óndirýshileri usynady.

Jármeńkede Abaı jáne Atyraý oblystarynyń agrarlyq óndirýshileri ártúrli et, balyq, sút ónimderi, bakaleıa taýarlary, sondaı-aq kókónis pen jemis-jıdekti tikeleı fermerlerden jetkizedi. Bul azyq-túlik qoljetimdiligin arttyrýǵa jáne otandyq óndirýshini qoldaýǵa yqpal etedi.

— Aýyl sharýashylyǵy taýar óndirýshileri Astanaǵa shamamen 400 tonna ónim ákeledi, onyń ishinde 140 tonna et jáne et ónimderi, 80 tonna kókónis pen jemis-jıdek, 70 tonna bal, 50 tonna baqsha ónimderi, 25 tonna balyq, 15 tonna sút ónimderi, shamamen 20 tonna basqa azyq-túlik ónimderi bar, — delingen habarlamada.

Qala turǵyndary men qonaqtary ónimdi tikeleı fermerlerden satyp alyp qana qoımaı, óńirlik shyǵarmashylyq ujymdardyń qatysýymen kontserttik baǵdarlamany da tamashalaı alady. Jármeńke 9:00–18:00 aralyǵynda jumys isteıdi.

Eske sala keteıik, bıylǵy jármeńke «Qazanat» ıppodromynyń avtoturaǵy aýmaǵynda, Qarqaraly tasjoly, 1 mekenjaıynda ótedi. Sondaı-aq qala turǵyndary men qonaqtarynyń yńǵaılylyǵy úshin jármeńke ótetin orynǵa № 18, 37 jáne 303 avtobýstary qatynaıdy.

Budan buryn elordanyń Almaty aýdanynda jańa alleıa ashylǵany habarlandy.