Astanadaǵy jańadan qurylǵan altynshy aýdan qalaı atalady?

ASTANA. KAZINFORM - Astanada jańadan altynshy aýdan quryldy. Búgin onyń ataýy qalalyq qoǵamdyq keńeste biraýyzdan maquldandy.

Sonymen, onomastıkalyq komıssııanyń otyrysyna 4 nusqa usynylǵan.

«Jeruıyq, Turan, Saýran jáne Saraıshyq. Sońǵysy jazýshylar men tarıhshylardyń da kóńilinen shyǵyp, kópshilik sol ataýǵa toqtaǵan. Sebebi qazaq handyǵynyń astanasy bolǵan jer. Mádenıetten bólek, saıası jáne saýda ortalyǵy retinde tarıhtan belgili. Tipti, kárizdik júıelerine deıin qalyptasqan órkenıetti meken. Sondyqtan Saraıshyq ataýy qoldaý tapty», - deıdi Astana qalasy Tilderdi damytý jáne arhıv isi basqarmasynyń basshysy Sáken Esirkep.

Onyń aıtýynsha, Almaty aýdany ekige bólinip, jańa aýdan quryldy. Jańa aýdandy tarıhı, ıdeıalyq ári mazmuny jaǵynan aıshyqtaý kerek.

«Saraıshyqty tańdap aldyq. Sebebi Saraıshyq – qazaq dalasyndaǵy eń kóne tarıhı oryn. 12 áýlıe baıyz tapqan. Júzden asa han bılik qurǵan. Jeti hannyń súıegi men bir hannyń basy jerlengen. Onyń ústine Astananyń Almaty, Baıqońyr, Esil, Nura, Saryarqa atty 5 ákimshilik bólinisi elimizdiń ár óńirinen syr shertse, Saraıshyq Batys atyrappen baılanysty. Osylaısha tórt qubyla túgendelip tur», - deıdi basqarma basshysy.

                                                                                                                                                                                                                                               Nysanaly YǴYL