Astanadaǵy jańa áýejaıdyń qurylysy qashan bastalady
ASTANA. KAZINFORM — Prezıdent Joldaýyn iske asyrý aıasynda barlyq avtokólik ótkizý beketteri jańǵyrtylady. Bul týraly Úkimet otyrysynda Premer-mınıstrdiń orynbasary — Ulttyq ekonomıka mınıstri Serik Jumanǵarın málim etti.
— Kólik-logıstıka áleýetin nyǵaıtý aıasynda eldiń ınfraqurylymyn keńeıtý negizgi baǵytqa aınalady. 2027 jyldyń mamyr aıynda Zaısan, Katonqaraǵaı jáne Kendirlide jańa áýejaılardy paıdalanýǵa berý josparlanǵan, al maýsym aıynda iri álemdik kompanııany tarta otyryp, Astanada áýejaı qurylysy bastalady. Sonymen qatar, 2027 jyldyń sońyna deıin «Baqty — Aıagóz» temirjol jelisin paıdalanýǵa berý josparlanyp otyr. Bul Qazaqstandy Eýrazııadaǵy kólik-logıstıkalyq habqa aınaldyrý boıynsha júıeli jumystyń bir bóligi bolady, — dedi Serik Jumanǵarın.
Onyń aıtýynsha, avtokólik salasynda respýblıkalyq jáne jergilikti mańyzy bar joldardy salý men qaıta qurý jumystary jalǵasady, onyń ishinde «Aral — Kaspıı» jáne «Kókshetaý — Petropavl» kúre joldary qarastyrylǵan.
— Barlyq avtokólik ótkizý beketterin tolyq qaıta qurý, sondaı-aq zııatkerlik kólik júıesin engizý arqyly júk tasymalyn elektrondyq qujattarǵa kóshirý júzege asyrylady, — dedi mınıstr.
Buǵan deıin habarlanǵandaı, búgin Úkimet otyrysynda Memleket basshysynyń bıylǵy 28 qazandaǵy «Jańa tarıhı kezeńdegi Qazaqstannyń ózekti mindetteri» atty Qazaqstan halqyna Joldaýyn iske asyrý jónindegi jalpyulttyq is-sharalar josparynyń» jobasy maquldanyp, tıisti qaýly qabyldandy.
