Astanadaǵy týrnırde qazaqstandyq balýandar toǵyz medal aldy

ASTANA. KAZINFORM — Astanada ótken dzıýdodan Qazaqstan Barysy Grand Slam týrnırinde qazaqstandyq balýandar toǵyz medal enshiledi. 

Úsh kúnge sozylǵan aıtýly jarysta el quramasy qorjynyna 3 kúmis jáne 6 qola medal tústi. Nátıjesinde medaldar kestesinde olar toǵyzynshy orynǵa turaqtady.

Halyqaralyq týrnırde el quramasynan Ǵusman Qyrǵyzbaev (66 keli), Erasyl Qajybaev (100 keliden joǵary), Talǵat Orynbasar (60 keli) ekinshi orynǵa taban tirese, Maǵjan Shamshadın (60 keli), Aman Baqytjan (60 keli), Abylaıhan Jubanazar (81 keli), Eset Qýanov (73 keli), Baqjan Baıtas (100 keli), Marat Baıqamurov (100 keli) qola júldeger atandy.

Medaldyq esepte IJF quramasy 3 altyn, 2 kúmispen kósh bastady. Odan keıingi oryndarǵa Ońtústik Koreıa (3 altyn), Japonııa (2 altyn, 4 kúmis, 1 qola) jaıǵasty. 

Halyqaralyq týrnırge álemniń 44 elinen 358 sportshy qatysyp, 14 salmaq dárejesinde baq synady. Olardyń arasynda Olımpıada chempıondary men álem birinshiliginiń jeńimpazdary bar.

Atalǵan jarys nátıjesinde IJF erejelerine sáıkes jarystyń jeńimpazdary men júldegerleri arasynda álemdik jáne olımpıadalyq reıtıngilerde upaılar bólinedi. Atap aıtqanda, І oryn úshin — 1 myń, kúmis júldegerge — 700, al qola medal alǵanǵa 500 upaı esepteledi.

Eske salsaq, bıyl Qazaqstan Barysy Grand Slam jarysy elimizde úshinshi ret ótti. Qazaqstan dzıýdo federatsııasy men Halyqaralyq dzıýdo federatsııasynyń (IJF) ekijaqty kelisimshartyna sáıkes, Qazaqstan álemdik Grand Slam jarysyn 2026 jylǵa deıin qabyldaıdy.