Dzıýdo: Astanadaǵy týrnırde Talǵat Orynbasar altynǵa talasady

ASTANA.KAZINFORM - Búgin Astana qalasynda jalaýyn kótergen dzıýdodan Qazaqstan Barysy Grand Slam týrnırinde Talǵat Orynbasar (60 keli) fınalǵa joldama aldy.

Qazaqstandyq balýan jartylaı fınaldaǵy taǵy bir otandasymyz Aman Baqytjanmen sheberlik baıqasqan edi. Beldesý barysynda Talǵat basymdyq tanytyp, bas júldege talasýǵa múmkindik aldy.

Atalǵan salmaqtaǵy taǵy bir beldesýde Maǵjan Shamshadın IJF ókili Iznaýr Saaevke ese jiberdi.

Endi Talǵat Orynbasar fınalda Iznaýr Saaevpen altyn medal úshin talasady.

Bul salmaqta alǵashqy aınalymda ońtústikkoreıalyq Lı Harımnen jeńilgen Dáýren Súıkenov júldesiz qaldy.

Eske salsaq, búgin Qazaqstan Barysy Grand Slam týrnırinde Ǵusman Qyrǵyzbaev (66 keli) fınalǵa shyqty.

Fınaldyq beldesýlerdi saǵat 17:00-de «Qazsport» telearnasynan kórýge bolady.

Sondaı-aq el quramasynan 66 kelide Erdáýlet Bozsha, Mıras Jonysov, Baýyrjan Narbaev boz kilemge shyqty.

Al áıelder arasynda 48 kelide Dıana Býrkeeva, 52 kelide Qundyz Jylqybaı, Aıshabıbi Muradımova, 57 kelide Dına Muhanbet, Dana Ábdirova jarystyń ár satysynda jolyn aıaqtady.