Astanadaǵy turǵyn úılerdiń qasbetine kondıtsıoner ornatýǵa tyıym salyna ma

Jańa talaptar qalanyń jańartylǵan dızaın-kodyna engiziledi. Onda turǵyn úıdiń klasy, sáýlettik erekshelikteri jáne ǵımarattyń syrtqy kelbeti eskerilmek.

Astana qalasy Sáýlet, qala qurylysy jáne jer qatynastary basqarmasynyń málimetinshe, turǵyn úılerdiń ártúrli sanattary úshin jeke-jeke talaptar belgilenedi. Mysaly, keıbir ǵımaratta kondıtsıonerdiń syrtqy bloktary arnaıy sándik qoraptarǵa ornatylýy tıis. Al basqa sanattaǵy úılerde olar ǵımarattyń sáýletimen úılesip, kósheden kórinbeıtindeı etip jasyrylýy qajet.

Astana qalasy Sáýlet, qala qurylysy jáne jer qatynastary basqarmasynyń basshysy Altynbek Ahmetovtiń aıtýynsha, jańa qujatta kondıtsıonerlerdi ornatýdyń naqty tártibi kórsetiledi.

— Bul qujatta kondıtsıonerlerdiń qalaı jáne qandaı tártippen ornatylýy kerektigi naqty jazylǵan, — dedi ol.

Alaıda jańa talaptardyń saqtalýyn baqylaý tártibi men olardy oryndamaǵandardy jaýapkershilikke tartý sharalary ázirge aıqyndalmaǵan. Basqarma ókilderiniń aıtýynsha, dızaın-kodtyń oryndalýyn qadaǵalaý tetigi bólek qujatpen bekitiledi.

Altynbek Ahmetov qazirgi tańda áńgime dızaın-kodtyń mazmuny týraly ǵana bolyp otyrǵanyn málimdedi. Al ony qoldaný tártibi keıin jeke rettelmek.

Turǵyn úılerdiń ártúrli sanattary úshin kondıtsıonerlerdi ornalastyrýǵa qatysty jeke-jeke talaptar engiziledi. Ýrbanıstıka ortalyǵynyń ókili Danııar Shyndalıevtiń aıtýynsha, birinshi jáne ekinshi sanattaǵy turǵyn úılerde kondıtsıonerdiń syrtqy bloktary ǵımarattyń sáýletine saı keletin arnaıy sebetterge ornalastyrylady.

Onyń aıtýynsha, mundaı konstrýktsııalar túsi men bezendirilýi jaǵynan ǵımarattyń jalpy sáýlettik stılimen úılesýi tıis.

Al basqa sanattaǵy turǵyn úılerde kondıtsıonerler ǵımarattyń sáýlettik jobasyna aldyn ala engizilip, syrt kózge kórinbeıtindeı etip ornatylýy qajet.

— Kondıtsıonerlerdi ǵımarattyń sáýlettik stıline qosý qarastyrylǵan. Olar syrttan kórinbeýi kerek. Sondaı-aq, kondıtsıoner ǵımarattyń qasbetine emes, kóterip turatyn arnaıy konstrýktsııaǵa bekitilýi tıis, — dedi ol.

Buǵan deıin salynǵan úılerdiń qasbetine kondıtsıonerlerdi ornatý máselesi burynǵydaı turǵyndardyń ortaq sheshimimen qaralady. Ondaı sheshim páter ıeleriniń jalpy jınalysynda qabyldanady.

Altynbek Ahmetovtiń málimdeýinshe, turǵyndar kelisim bergen jaǵdaıda da ǵımarattyń syrtqy sáýleti sol qalpynda saqtalýy tıis. Sondyqtan ornatylǵan kondıtsıoner arnaıy qaptamamen nemese materıalmen jabylýy qajet.

— Úı salynyp, qoldanysqa berilgennen keıin keıbir azamat kondıtsıoner ornatqysy kelýi múmkin. Bul másele turǵyndardyń jalpy jınalysynyń hattamasy arqyly sheshiledi. Eger barlyq turǵyn kelisip, kondıtsıonerdi qasbetke ornatýǵa ruqsat berilse de, ol mindetti túrde ǵımarattyń sáýlettik stılin buzbaıtyn arnaıy elementtermen qaptalýy tıis, — dep túsindirdi ol.

Jańa talaptardy buzǵan azamattar tartylatyn jaýapkershilik qashan engiziletini ázirge belgisiz. Dızaın-kod bekitilgennen keıin baqylaý jáne jaýapkershilik tártibi jeke qujatpen aıqyndalady.

Qazir azamattar abattandyrý qaǵıdalaryn buzǵany úshin tartylatyn jaýapkershilik Ákimshilik quqyq buzýshylyq týraly kodekstiń 505-babynda qamtylǵan.

Al kondıtsıonerlerdi ornatýǵa qatysty jańa talaptardy buzý faktileri de osy bap boıynsha qarala ma, joq pa — bul másele áli naqtylanbaǵan. Joǵaryda jazǵanymyzdaı, baqylaý jáne ákimshilik jaýapkershilikke tartý tártibi keıinirek jeke qujatpen belgilenedi.

Aıta keteıik, buǵan deıin elordada dızaın-kodqa saı jóndeletin úıler tizimi bekitildi.