Astanadaǵy «Tulpar» saýda ortalyǵy mańyndaǵy skver sot sheshiminen keıin aıaqtalady
ASTANA. KAZINFORM — «Tulpar» saýda ortalyǵy janyndaǵy bolashaq skver ornalasqan aýmaqta súrilýi tıis bir nysan boıynsha sot protsesi júrip jatyr, dep habarlady Baıqońyr aýdany ákimdigi Kazinform agenttiginiń saýalyna bergen jaýabynda.
Sondyqtan shamamen 7,5 myń sharshy metr aýmaqtaǵy abattandyrý jumystary sot sheshimi shyqqannan keıin jáne qolaıly aýa raıy ornaǵanda — 2026 jyly aıaqtalady dep josparlanyp otyr.
Sonymen birge bolashaq skver aýmaǵynyń bir bóligi qazirdiń ózinde abattandyrylǵany anyqtaldy.
— Búginde nysannyń bir bóligi tolyq aıaqtaldy. Atap aıtqanda, 5 280 sharshy metrge brýschatka men asfalt tóselip, 24 jaryq shamy ornatyldy. Sondaı-aq 160 aǵash, 3 474 sándik buta men kópjyldyq gúl otyrǵyzyldy. Uzyndyǵy 965 metr bolatyn Sh.Ýálıhanov kóshesi boıyndaǵy aýmaqty qamtıtyn jergilikti sýarý júıesi ornatylyp, ol shamamen 11 000 sharshy metr jerdi sýarýmen qamtamasyz etedi, — delingen aýdan ákimdiginiń habarlamasynda.
Joba Astana qalasynyń «Ýrbanıstıka ortalyǵy» ázirlegen eskızge sáıkes júzege asyrylyp jatyr.
Ákimdik ókilderi jobada arhıtektýralyq sheshimder men kógaldandyrý kólemine aıtarlyqtaı ózgerister engizilmegenin atap ótti. Qurylys pen abattandyrý tolyq aıaqtalǵan soń qoǵamdyq keńistiktiń resmı ashylýy ótýi múmkin.
Joba talqylanǵan kezde aýdan turǵyndary kógaldandyrý men demalys aımaǵyn jaqsartý jóninde óz usynystaryn bildirgen, olardyń bir bóligi eskerilgen.
Qalalyq ákimdik ókilderiniń aıtýynsha, ınjenerlik izdenister men jobalaý jumystaryna ruqsat 2026 jylǵy 6 naýryzǵa deıin berilgen.
Jobaǵa sáıkes, jańa qoǵamdyq keńistikte jaıaý júrginshilerge arnalǵan aımaqtar men trotýarlar, saıabaq shamdary, kógaldandyrý jáne avtomatty sýarý júıesi qarastyrylǵan. Skver aýmaǵynda saýda núkteleri bolmaıdy.
Astana ákimdigi taǵy da skverge qajetti jer satyp alýǵa bıýdjetten aqsha surap otyrǵany belgili boldy. Bul týraly qalalyq qoǵamdyq keńestiń otyrysynda Ekonomıka jáne bıýdjettik josparlaý basqarmasynyń basshysy Aıjan Túgelbaeva málim etti.