Astanadaǵy Taldykól mańynda jaıly mektep salynady
ASTANA. KAZINFORM – Astana qalasynyń ákimi Jeńis Qasymbek Taldykól mańyndaǵy qurylys jumystaryna qatysty taǵy da túsinik berdi.
«Eger Taldykól mańyndaǵy 5-shi jer ýchaskesi týraly aıtyp otyrsańyz, onyń kól aýmaǵyna eshqandaı qatysy joq, arasy birneshe shaqyrym. Bıyl qańtarda jelide taraǵan vıdeoǵa kelsek, bir ǵana turǵyn úıdiń qurylysy, ol jerde turǵyn úıler kesheni salynbaıdy. Ol boıynsha qajet jaǵdaıda máseleni sot tártibimen sheshetin bolamyz», - dedi Jeńis Qasymbek Úkimet otyrysynan keıin ótken baspasóz máslıhatynda.
Elorda ákiminiń aıtýynsha, Taldykól aınalasynda qurylys jumystary júrip jatqan joq.
«Kólge jaqyn jerde jaıly mektep salý josparlanýda, biraq bul halyqtyń suranysy boıynsha. Al buǵan deıin aıtylǵan saıabaq jobasy iske asyrylady. Oǵan bıyl bıýdjetten qarjy bólinip, merdiger uıym belgilendi. Biraq, byltyr qarashada saıabaq jobasyna qatysty eko-belsendilerden qosymsha usynystar berildi, biz olardy qaraımyz. «Ellington» turǵyn úı kesheniniń 5 ýchaskege qatysy joq. Kól jaǵalaýyna turǵyn úı kesheni salynyp jatqan joq, qurylys jumysy toqtatyldy», - deıdi ol.
