Astanadaǵy sport saraılary halyqaralyq jarystardy qabyldaı alady – Marıýs Vızer

ASTANA. KAZINFORM – Qazaqstanǵa resmı saparmen kelgen Halyqaralyq dzıýdo federatsııasynyń (IJF) prezıdenti Marıýs Vızer elordadaǵy sport nysandaryn aralap, jumys barysymen tanysty.

QR Týrızm jáne sport mınıstrliginiń baspasóz qyzmetinen málim etkenindeı, Marıýs Vızer eń aldymen 2019 jyly paıdalanýǵa berilgen Jaqsylyq Úshkempirov atyndaǵy jekpe-jek saraıyna bardy.

Jekpe-jek saraıy – kúres túrleri (grek-rım, erkin, áıelder kúresi, dzıýdo, karate, taekvondo, aralas jekpe-jek) boıynsha halyqaralyq jarystardy ótkizý múmkindigi bar biregeı sport kesheni.

IJF basshysy sondaı-aq qurylysy 2025 jyldyń sońynda aıaqtalatyn Ulttyq sport ýnıversıtetiniń qurylysymen tanysty.

Budan bólek mártebeli meıman balǵyn palýan balalarmen, belgili qazaqstandyq sportshylarmen kezdesti. Olardyń qatarynda Parıj Olımpıadasynyń qola júldegeri Ǵusman Qyrǵyzbaev, Parıj Paralımpıadasynyń chempıony Aqmaral Naýatbek, álem jáne Azııa birinshiliginiń júldegeri Ábıba Ábýjaqynova, 2009 jylǵy álem chempıony Maksım Rakov boldy. Kezdesý barysynda Qazaqstanda dzıýdo sportyn damytý jáne halyqaralyq arenaǵa shyǵý múmkindigi sóz boldy.

«Astanaǵa kelgenime jáne sizdermen kezdeskenime qýanyshtymyn. Búgin birneshe sport keshenin aralap, tamasha sport ınfraqurylymdarymen tanystym. Bul nysandardyń kez kelgeni halyqaralyq deńgeıdegi jarystardy qabyldaýǵa múmkindigi bar. Sondaı-aq Astanada salynyp jatqan Ulttyq sport ýnıversıtetiniń qurylysyn kórdim. Biregeı bilim ordasy Qazaqstannyń sport salasyndaǵy kásibı mamandaryn daıarlaýda mańyzdy ról atqarary daýsyz», – dep atap ótti Vızer.

Eske sala keteıik, budan buryn Abzal Ájiǵalıevtiń muz jáne jyldamdyq ózine óte unaıtyny týraly aıtqanyn jazǵan bolatynbyz.