Astanadaǵy sot protsesinde Darhan Jolshybekov pen Nurbek Nurtaza kýáger boldy
ASTANA. KAZINFORM — Elordada bloger Erbolat Janabylov pen Elmıra Tólegenovaǵa qatysty qylmystyq is boıynsha sot protsesi jalǵasyp jatyr.
Kezekti sot tyńdalymyna kýá retinde Almatydan bloger Darhan Jolshybekov pen Nurbek Nurtaza keldi.
Darhan Jolshybekovtiń sózinshe, ol Janabylov otbasymen bes jyldan astam ýaqyt tanys. Aıtýynsha, erli-zaıyptylar Jolshybekovten utys oıyndary jóninde aqparat suraǵan.
- 2025 jyldyń kókteminde osyndaı áńgime boldy. Ol ınternetten meniń lotereıa ótkizýge baılanysty sot daýlaryna qatysqanymdy kórip, qandaı jaza alǵanymdy surady. Men oǵan ákimshilik jaýapkershilikke tartylǵanymdy habarladym, - dedi Darhan Jolshybekov.
Munan soń blogerlerdiń advokaty Gaýhar Aıtjanova kýágerge buǵan deıin aralarynda jeke renish nemese teris kózqaras bar-joǵyn surady.
— Naqty aıta almaımyn. Boldy ma, bolmady ma — bilmeımin, - dedi bloger.
Odan keıin sot barysynda kýáger retinde Nurbek Nurtaza sóz sóıledi. Belgili bolǵandaı, buǵan deıin Nurbek Nurtaza jazylýshylaryna satqan kýrstarda jáne Janabylovtar usynǵan bilim kýrstarynda da spıker Áset Aqbar bolǵan. Osy tusta Elmıra Tólegenova kýrstardyń bir-birimen mazmuny jaǵynan uqsastyq bar-joǵyn bilgisi keldi. Nurtaza jeke ózi materıaldardy zerttemegenin málimdedi.
- Men sizderdiń oqý kýrstaryńyzdy kórgen joqpyn. Tanyspaǵandyqtan, eshqandaı paıyzdyq baǵa bere almaımyn. Men tek sarapshy Áset Akbardyń sózine súıendim. Meniń oıymsha, kez kelgen Qytaımen bızneske qatysty oqytý kýrstary negizinen uqsas bolady, – dedi ol.
Eki kýáger de buǵan deıin áleýmettik jelidegi paraqshalarynda onlaın utys oıyndaryn uıymdastyrǵan. Tergeý barysynda olar bul isteri úshin ákimshilik jaýapkershilikke tartylǵanyn habarlady.
Aıta keteıik, 2025 jyly 11 avtokólikti utysqa qoıyp, kýrs satqan blogerler Erbolat Janabylov pen Elmıra Tólegenovanyń áreketi Qazaqstan Respýblıkasynyń Týrızm jáne sport mınıstrligi nazaryna ilikken bolatyn.
2025 jylǵy 26 tamyzda Erbolat Janabylovqa qatysty Ákimshilik quqyq buzýshylyq týraly kodeks boıynsha hattama toltyrylyp, is sotqa joldandy.
Al 2025 jylǵy 16 qazanda blogerlerge qatysty ákimshilik sıpattaǵy is qylmystyq óndiriske aýystyryldy.
Alaıda 13 naýryzda ótken aldyn ala sot tyńdalymynda Janabylovtardyń advokaty Gaýhar Aıtjanova isti prokýratýraǵa qaıtarýdy suraǵan. Sot bul ótinishti qanaǵattandyrýdan bas tartty.
Osy jyldyń 16 naýryzynda blogerlerge qatysty qylmystyq is boıynsha sot protsesi bastalyp, kýágerler sóz sóıledi.
