Astanadaǵy SOS balalar aýylyna 25 jyl toldy
ASTANA. KAZINFORM – Astanada «SOS Astana balalar aýylynyń» 25 jyldyǵyna arnalǵan merekelik shara ótti. Osy shırek ǵasyrda bul aýylda 200-den asa bala tárbıe alyp shyqty. Qazir olardyń basym bóligi óz betinshe ómir súrip, mamandyq ıesi atanyp, otbasyn qurǵan.
Merekege túlekter, balalar, uıym qyzmetkerleri, tárbıeshi analar, seriktester men memlekettik organ ókilderi jınaldy. Olar — otbasy úlgisindegi tárbıeni damytýǵa jyldar boıy úles qosyp kele jatqan jandar.
Otbasyndaǵy tárbıe — ınternatqa balama
SOS balalar aýyldary — bul ınternat ta, memlekettik mekeme de emes. Bul — otbasy sekildi sezim syılaıtyn erekshe format. Bir úıde 4–5 bala men tárbıeshi ata-ana (nemese tárbıeshi jup) birge turady. Balalar jalpy bilim beretin mektepterde oqyp, qosymsha úıirmelerge qatysady, ár balaǵa jeke qoldaý kórsetiledi.
2017 jyldan beri Astanada «ıntegratsııalanǵan otbasy» formaty engizilgen. Tárbıeshiler men balalar aýyl ishinde ǵana emes, qalanyń turǵyn aýdandarynda da turady.
— Basty mindetimiz — balalardy qoǵamǵa beıimdeý. Túlekterdiń 80 paıyzy qoǵamǵa jaqsy sińdi. 25 paıyzy joǵary bilim alyp jatyr. Búgingi merekege olar óz balalarymen, otbasylarymen keldi. Bul — eńbegimizdiń zaıa ketpegenniń aıǵaǵy, — deıdi SOS balalar aýylynyń dırektory Gúlnar Úskenbaeva.
25 jyldyń qorytyndysy men bolashaqqa jospar
2000 jyly qurylǵan aýyl bul ýaqytqa deıin 200-den asa balany qabyldap, tárbıeledi. Qazir munda 90-ǵa jýyq bala men jasóspirim 14 otbasyna biriktirilgen. Sonymen qatar, Astanada 20 balaǵa arnalǵan top retinde biriktirilgen jasóspirimder úıi bar. Bul — aýyldaǵy ómir men eresek ómirdiń arasyndaǵy ótpeli kezeń.
Aýyl dırektorynyń orynbasary Álııa Ahatova balalar men otbasylardy qoldaý ortalyǵynyń (BOQO) qyzmetin erekshe atap ótti.
— 2020 jyldan beri biz 600-ge jýyq balasy bar 200-den astam otbasynyń birligin saqtap qalýǵa kómektestik. Qazir de taǵy da 200 bala bar 60 otbasyǵa qoldaý kórsetip jatyrmyz, — dedi ol.
Seriktesterdiń qoldaýy
Tımýr Qulybaevtyń Halyk qaıyrymdylyq qory jobalardy júzege asyrýǵa kóp kómek kórsetip jatyr. Qordyń kómegimen Astana, Almaty jáne Qaraǵandy qalalarynan páterler satyp alynyp, balalar men jastardyń áleýmetke beıimdelý múmkindigi artty. Sondaı-aq, Qazaqstandaǵy SOS balalar aýyldarynyń tabysty tájirıbesin taratýǵa baǵyttalǵan otbasy úlgisindegi balalar aýyldary boıynsha úılestirý keńesiniń jobasy júzege asyrylyp jatyr.
— Biz balalarǵa ózderin úıdegideı erkin sezinýge jáne eresek ómirge qajet daǵdylardy meńgerýge bar kúshimizdi salyp jatyrmyz. Munda olar sheshim qabyldaýdy, maqsat qoıyp, soǵan jetýdi úırenedi, — deıdi qor dırektory Saǵynbek Shúnkeev.
Memleket te bul baǵyttaǵy jumysty qoldaıdy. Oqý-aǵartý mınıstrligi Balalardyń quqyqtaryn qorǵaý komıtetiniń tóraǵasy Nasymjan Ospanova.
— 25 jyl — tutas bir dáýir. Bul ýaqyt ishinde qıyn jaǵdaıda qalǵan balalarǵa otbasyn tabýǵa kómektesý, qamqorlyq, qorǵaý jáne qoldaý kórsetý sııaqty mańyzdy mıssııany oryndap kelesizder. Qazir SOS Astana balalar aýyly balalar turatyn jaı ǵana meken emes, olardy súıetin, baǵalaıtyn, tyńdaıtyn jáne qoldaıtyn jyly úı, — dedi Nasymjan Ospanova.
Aýyldan ushqan túlekter
Merekede aýyl túlekterine erekshe qurmet kórsetildi. Aýyldyń tuńǵysh shákirti Sultan Jeńishan qazir Qytaımen jumys istep júrgen kásipker.
— Bul — men úshin erekshe sát. Men osy úlken otbasynyń bir bóligi bolǵanyma qýanyshtymyn. Munda meniń tulǵa bolyp qalyptasýyma áser etken jylý men tárbıe aldym, — dedi ol.
Taǵy bir túlek Islam Rýchkın de pikir bildirdi.
— Aýyl bolmasa, bizdiń ómirimiz múlde basqasha bolýy múmkin edi. Bizge mańyzdy nárselerdi úıretti: qamqorlyqty baǵalaý, bolashaǵymyzdy qurý, jaqyndarymyzdy súıý, — dedi Islam Rýchkın.
25 jylda 24 balany tárbıelep ósirgen tárbıeshi ana Janar Rahymbaeva da eńbektiń shynaıy jemisi ekenin atap ótti.
— Birinshiden, bul — balalardyń merekesi. Osy jerde otyrǵanymnyń ózi — maqtanysh. Qazir meniń alty nemerem bar. Bizdiń eńbegimizdiń shynaıy jemisi osy emes pe?, — dedi ol.
Anyqtama
SOS balalar aýyldarynyń Qazaqstandaǵy korporatıv qory 1994 jyly qurylǵan. Quryltaıshylar — SOS Children’s Villages International halyqaralyq uıymy men NNEF qoǵamdyq qory. Qor Astana, Almaty, Qaraǵandy jáne Temirtaý qalalarynda jumys isteıdi.
Búginge deıin aýyldarda 900-den asa bala tárbıelenip shyqty, al áleýmettik jobalar arqyly 3000-ǵa jýyq bala men otbasy keshendi qoldaýǵa ıe boldy.
Sharada jıi aıtylǵan bir sóılem bárin túıindedi: «Ár balaǵa mahabbatqa toly otbasyna laıyq». Bul — SOS balalar aýyldarynyń basty mıssııasy: balaǵa tek baspana emes, otbasy, jylý pen bolashaq syılaý.