Astanadaǵy «Sıtı Palas» saýda-oıyn-saýyq ortalyǵy Jusan Bank-ke ótti
ASTANA. KAZINFORM – Astana qalasynyń oń jaǵalaýynda 10 jyldan astam ýaqyt boıy salynyp kele jatqan «Sıtı Palas» saýda-oıyn-saýyq ortalyǵynyń menshik ıesi aýysty. Jyljymaıtyn múliktiń biryńǵaı memlekettik kadastryndaǵy ashyq málimetke qarap osyndaı qorytyndyǵy kelýge bolady.
Respýblıka dańǵyly men A. Imanov kóshesiniń qıylysynda ornalasqan nysan osydan 10 jyl buryn Respublica Plaza deıtin saýda-oıyn-saýyq ortalyǵy retinde salyna bastaǵan. Sodan beri qurylys áli bitpeı keledi. Sońǵy ret bıylǵy 17 shildede BAQ-ta «saqaldy» qurylys 2026 jyly aıaqtalatyny, ınvestor retinde «Investment & Innovation Group» JShS, merdiger retinde «Elhon» JShS kiriskeni habarlanǵan edi.
Jyljymaıtyn múliktiń biryńǵaı memlekettik kadastryndaǵy ashyq málimetke súıensek, aýdany 1.6645 gektar bolatyn nysannyń kadastrlyq quny 205 mln 791 myń 296 teńge ekeni aıtylǵan. Al quqyq ıesi «First Heartland Jusan Bank» aktsıonerlik qoǵamy dep kórsetilgen.
Jusan Bank-ke ashyq derektegi málimet týraly banktiń resmı ustanymy, «saqaldy» qurylystyń aldaǵy taǵdyry qalaı bolatynyn surap habarlastyq. Banktiń baspasóz qyzmeti qandaıda bir pikir bildirýden bas tartty.
2023 jyldyń kúzinde «Sıtı Palastyń» qurylysy Jusan Bank ınvestıtsııasynyń aýyrtpalyqtaryna baılanysty toqtatylǵany málim bolǵan edi.
Astana qalasy ákimdigi qurylysqa tapsyrys berýshi uıym «Merey real estate managment» JShS ekenin aıtqan.
Jusan Bank-tiń baspasóz qyzmeti «Nysan Jusan Bank-ke borysh kepildiginiń sharty boıynsha ótti me?» - degen suraqqa da jaýap berýden bas tartty.
