Astanadaǵy Shubar eldi mekeni gazǵa qosyldy
ASTANA. KAZINFORM – Astanany gazdandyrý jónindegi aýqymdy joba aıasynda elordanyń Shubar eldi mekeni tabıǵı otynǵa qosyldy, dep habarlaıdy qala ákimdiginiń resmı saıty.
Elorda ákimdiginiń Energetıka basqarmasy «Astana qalasyn gazdandyrý. Qurylystyń III kezegi. Shubar turǵyn alabyn gazdandyrý (1-5 iske qosý keshenderi)» jobasyn iske asyrdy. Osy jumys aıasynda orta qysymdy 7,5 shaqyrym gaz jetkizý qubyry, sondaı-aq tómen qysymdy 31,3 shaqyrym ishki taratý jelileri salyndy. Nátıjesinde eldi mekendegi 890 jeke úı tabıǵı gazǵa qol jetkizdi.
Osyǵan deıin ákimdik tarapynan gazben qamtý jelilerin salý boıynsha aýqymdy jumys atqarylyp, jalpy uzyndyǵy 950 shaqyrymdy quraıtyn gaz jelileri júrgizilgen bolatyn.
Qazirgi tańda «Kóktal-1», «Kóktal-2», «Agroqalashyu», «Temirjolshylar», «Promyshlennyı», Ońtústik-Shyǵys (oń jaq bóligi), Ońtústik-Shyǵys (sol jaq bóligi), «Kúıgenjar», «Mıchýrıno», «Internatsıonalnyı», Family Village, Vela Village, «Úrker», «Telman», «Kirpishti», sondaı-aq «Aqbıdaı», «Qazaqaýyl» shaǵynaýdandary men Potanın kóshesi aýmaǵyndaǵy qalanyń eski bóligin qosa alǵanda, birqatar eldi meken tabıǵı gazǵa qosyldy. Qazirgi ýaqytta gazǵa 13,8 myńnan astam abonent qosylǵan.
Sonymen qatar JEO-1 jáne JEO-2 nysandaryndaǵy 16 qazandyq gazǵa aýystyryldy. «Turan» jáne «Ońtústik-Shyǵys» gaz jylý stantsııalary salyndy, olardyń jıyntyq qýaty 950 Gkal/saǵ quraıdy. Qýaty 620 Gkal/saǵ bolatyn «Telman» gaz jylý stantsııasynyń qurylysy jalǵasyp jatyr.
Osylaısha, bıyl «Astana qalasyn gazdandyrý» jobasynda kózdelgen barlyq eldi meken men energııa kózderi tabıǵı gazben tolyq qamtylatyn bolady.
Budan buryn Shymkentte gaz úshin artyq eseptelgen 80,9 mln teńge tutynýshylarǵa qaıtarylatynyn jazǵanbyz.