Astanadaǵy sezd: Iran ókili Gazadaǵy oqıǵalardy shynaıy taratýǵa shaqyrdy
ASTANA. KAZINFORM – Qazirgi ýaqytta kıberkeńistiktiń ıeleri shynaıy jaǵdaıdy burmalaýǵa nemese jabýǵa jappaı kúsh salyp jatyr. Bul týraly Álemdik jáne dástúrli dinder kóshbasshylarynyń VIII Cezinde Irannyń Islam mádenıeti jáne baılanystary uıymynyń prezıdenti Mýhammad Mehdı Imanıpýr málim etti.
- Biz adam ómiriniń qıyn kezeńderiniń birinde ómir súrip jatyrmyz. Keıbir máselelerdi sheshý qıynǵa túsetini anyq. Olardyń ishinde ózimniń qysqasha baıandamamnyń taqyryby retinde tsıfrlyq quldyqty tańdadym, ıaǵnı bul negizgi problemalardyń biri sanalady. Kúndelikti ómirimiz Internetke, áleýmettik jelilerge jáne tsıfrlyq qyzmetterge kóbirek táýeldi bolyp barady. Bul táýeldilik paıdalanýshylardy negizgi sheshimder qabyldaýǵa áser etetin jıyntyq qyzmetter men ekojúıelerge ıtermeleıdi. Táýeldiliktiń bul túri ekonomıkalyq nemese mádenı quldyq sııaqty tańdaý jáne is-qımyl bostandyǵyna shekteýler týdyrýy múmkin, - dedi Mýhammad Mehdı Imanıpýr.
Onyń paıymynsha, jetildirilgen algorıtmder paıdalanýshy áreketin baǵyttaı alady, al keıbir jaǵdaılarda adamdar ǵalamtordaǵy osy basqarý áreketin túsinbeýi de múmkin.
- Sondaı-aq Big Data-lardyń ıelerine jeke toqtalǵym keledi, olar aýqymdy derekterdi basqara otyryp, onyń bárin qazirgi gıbrıdtik soǵysta qural retin paıdalanyp otyr. Qazirgi ýaqytta kıberkeńistiktiń ıeleri shynaıy jaǵdaıdy burmalaýǵa nemese jabýǵa jappaı kúsh salyp jatyr. Keıbir paıdalanýshylardyń jazbalary men pikirleri óshpendilik týdyrdy degen jeleýmen ońaı joıylady. Mysaly, Gazadaǵy oqıǵalar burmalanyp, jasyrylǵan. Eger alpaýyt derjavalar kontentti jáne úlken derekterdi baqylap, jalǵan pikirdi qalyptastyrýdy jalǵastyrsa, bolashaqta shynaıy aqparatty taratamyz dep qalaı úmittene alamyz?, - dedi Iran ókili.
Aıta keteıik, Álemdik jáne dástúrli dinder kóshbasshylary VIII Seziniń jalpy otyrysynda Memleket basshysy Qasym-Jomart Toqaev jasandy ıntellektini damytý etıkasy jónindegi dinaralyq komıssııa qurýdy usyndy.
Ol neırojeliler men basqa da serpindi tehnologııalardy jaýapkershilikpen paıdalanýdyń ámbebap qaǵıdattaryn ázirleýmen aınalysady.