Astanadaǵy saýda ortalyǵynda bomba bar dep jalǵan habar bergen ýkraınalyq ustaldy
ASTANA.KAZINFORM – Qazaqstan polıtsııasy halyqaralyq áriptestermen birlesip kıberqylmysqa qarsy jumysty kúsheıtip otyr. Bul týraly QR ІІM Kıberqylmysqa qarsy is-qımyl departamentiniń bastyǵy Jandos Súıinbaı Ortalyq kommýnıkatsııalar qyzmetinde ótken brıfıngte aıtty.
Onyń sózinshe, terrorızm aktileri týraly kórineý jalǵan habarlaıtyn adamdardy anyqtaý boıynsha jumys jalǵasyp jatyr.
– Mysaly, tamyz aıynda halyqaralyq ózara is-qımyl sheńberinde Ýkraınanyń kıberpolıtsııasymen birlesip, osy eldiń turǵynyn ustadyq. Ol Astanadaǵy saýda ortalyqtarynyń birinde jarylǵysh qurylǵy ornatyldy dep kórineý jalǵan habar bergen, – dedi departament basshysy.
Sondaı-aq Reseı ІІM qyzmetkerlerimen birlesip, Astana men Almatyda polıtsııany jalǵan shaqyrtýmen bireýdiń mekenjaıyna jibergen 3 jaǵdaı boıynsha Reseı azamaty anyqtaldy. Departament basshysy azamattardyń derbes derekterin zańsyz jınaý jáne taratý máselesiniń de ózekti ekenin atap ótti.
– Mamyr aıynda Chehııa polıtsııasymen birlesip, Ýst-nad-Labem qalasynda Qazaqstan azamattarynyń derbes derekterin taratqan halyqaralyq arnany joıý boıynsha arnaıy operatsııa júrgizdik, – dedi Jandos Súıinbaı.
Atalǵan is boıynsha Ýst-nad-Labem, Astana, Almaty jáne Qaraǵandy qalalarynda 6 adamnyń turǵylyqty mekenjaıynda tintý júrgizildi. Olardyń barlyǵy – Qazaqstan azamattary. Qylmystyq shemanyń 3 tikeleı uıymdastyrýshysy ustalyp, qamaýǵa alyndy.
Aıta keteıik, úsh aıda 1595 kıberqylmys anyqtaldy.
