Astanadaǵy irikteý týrnırinde jeńicke jetken boksshylar belgili boldy
ASTANA. KAZINFORM – Búgin elordada bokstan irikteý týrnıriniń fınaldyq kezdesýinde tórt salmaqta jeńimpaz anyqtaldy.
Atalǵan týrnırde áıelder arasyndaǵy aıqasynda 66 kelide fınalda Soltústik Qazaqstan oblysynyń ókili Natalıa Bogdanova men qaraǵandylyq Jasmın Qızatovamen sheberlik baıqasty. Úsh raýndtyń qorytyndysy boıynsha, tóreshiler sheshimimen jeńiske Natalıa laıyqty dep tanyldy.
Al, áıelder arasynda 54 kelide Uljan Sársenbek top jardy. Bul salmaqta eń kóp boksshy jınalǵan edi. Olardyń arasynan Uljan óz babynda ekenin kórsetti.
Ol fınalda tóreshilerdiń biraýyz sheshimimen Symbat Álıasqardan basym tústi. Oǵan deıin 2022 jyly jastar arasynda álem chempıony atanǵan Elına Bazarova, álem chempıonatynyń 3 márte júldegeri Jaına Shekerbekovany orta jolda qaldyrdy.
Erler arasynda sparrıngtik irikteý básekesiniń 63,5 keli salmaq dárejesinde túrkistandyq Muhammedsabyr Bazarbaıuly jeńimpaz boldy. Fınalda ol jambyldyq Dýlat Bekbaýovty qapy qaldyrdy. Muhammedsabyr osy salmaqta ótken jyly Qazaqstan spartakıadasynda jeńimpaz atanǵan edi.
75 kelide baq synaıtyn Valentına Halzova men Gúlsaıa Erjannyń arasynda jekpe-jek te tartysqa toly boldy. Tóreshiler sheshimimen Valentına Halzova lıtsenzııalyq týrnırge qatysýǵa múmkindik aldy.
