Astanadaǵy reıdter: kámeletke tolmaǵandar arasynda 150 zań buzýshylyq anyqtaldy
ASTANA. KAZINFORM — Kámeletke tolmaǵandar arasyndaǵy quqyq buzýshylyqtar men qylmystardyń aldyn alý maqsatynda elordanyń bes aýdanynda turaqty negizde «Túngi qaladaǵy balalar» jedel-aldyn alý is-sharalary ótkiziledi. Reıdtik is-sharalar bastalǵannan beri 150-ge jýyq ákimshilik quqyq buzýshylyq anyqtaldy, onyń ishinde QR ÁQBtK-niń 442-baby 2-bóligi boıynsha 109 fakt anyqtaldy, dep habarlaıdy elorda ákimdiginiń resmı saıty.
Polıtseıler aýdandyq ákimdikterdiń, bilim basqarmasynyń qyzmetkerlerimen jáne Astana qalasy ákimdigi janyndaǵy Áıelder isteri jáne otbasylyq-demografııalyq saıasat jónindegi komıssııanyń múshelerimen birlesip, kámeletke tolmaǵandardyń qoǵamdyq oryndarda zańdy ókilderiniń erip júrýinsiz keshki nemese túngi ýaqytta bolý jaǵdaılaryn anyqtaý maqsatynda kósheler men oıyn-saýyq oryndaryn tekseredi.
Saryarqa astanalyq aýdanyndaǵy reıd barysynda mobıldi top Ákimshilik quqyq buzýshylyq týraly 17 hattama toltyryp, 6 kámeletke tolmaǵan jasóspirim arnaýly áleýmettik qyzmetterge muqtaj balalardy qoldaý ortalyǵyna ornalastyryldy.
Esil aýdanynda monıtorıngtik toptyń qyzmetkerleri QR ÁQBtK 442-baby boıynsha úsh aılyq eseptik kórsetkish mólsherinde zańdy ókilderine aıyppul túrinde tartylǵan 62 kámeletke tolmaǵan jasóspirimdi anyqtady. Esterińizge sala keteıik, ákimshilik jaza qoldanylǵannan keıin bir jyl ishinde qaıtalama quqyq buzýshylyq jasaǵany úshin (ÁQBtK 442-babynyń 3-bóligi) 2 001 adamǵa 30 274 003 teńge somasynda aıyppul salyndy. Aıyppul jeti aılyq eseptik kórsetkishti quraıdy.
Baıqońyr aýdanynda jedel-profılaktıkalyq is-sharalar barysynda 57 kámeletke tolmaǵan jasóspirim anyqtalyp, jergilikti polıtsııa basqarmalaryna jetkizildi. Bul balalardyń zańdy ókilderi ákimshilik jaýapkershilikke tap boldy. Sondaı-aq oıyn-saýyq mekemeleriniń ıeleri QR Ákimshilik quqyq buzýshylyq týraly Kodeksiniń 132-babyna sáıkes kámeletke tolmaǵandardy óz mekemelerine jibergeni úshin ákimshilik jaýapkershilikke tartyldy.
Nura aýdanynyń aýmaǵy boıynsha reıdtik is-sharalar kezinde mynadaı quqyq buzýshylyqtar anyqtaldy: 48 jasóspirim saǵat 23.00-den keıin ata-anasynyń nemese zańdy ókilderiniń súıemeldeýinsiz júrgen, bul 442-bap boıynsha ákimshilik aıyppul salýǵa ákep soqtyrdy; 437-bap boıynsha túngi ýaqytta tynyshtyqty buzǵany úshin 437-bap boıynsha ákimshilik hattama jasaldy; 2 ata-ana 127-bap jáne 10 AEK mólsherinde aıyppul salyndy.
Reıd barysynda Almaty aýdanynda mobıldi top kámeletke tolmaǵan jasóspirimderdiń eresekterdiń erip júrýinsiz túngi ýaqytta bolǵan 6 jaǵdaıdy anyqtady. Onyń qorytyndysy boıynsha ata-analarǵa hattama toltyrylyp, ákimshilik aıyppul salyndy.
Esterińizge sala keteıik, QR Ákimshilik quqyq buzýshylyq týraly Kodekstiń 442-baby boıynsha 22.00-den 6.00-ge deıin kámeletke tolmaǵandardyń oıyn-saýyq oryndarynda zańdy ókilderiniń erip júrýinsiz júrýge tyıym salynady, sondaı-aq saǵat 23.00-den 6.00-ge deıin kámeletke tolmaǵandarǵa zańdy ókilderiniń erip júrýinsiz turǵyn úıden tys jerde bolýyna tyıym salynady.
Aıta keteıik, Astana qalasy prokýratýrasynyń, Quqyq qorǵaý jáne memlekettik organdardyń úılestirýimen, Astana qalasy ákimdigi janyndaǵy Áıelder isteri jáne otbasylyq-demografııalyq saıasat jónindegi komıssııa múshelerimen jáne aýdandyq ákimdiktermen birlesip, túngi ýaqytta qala kóshelerinde jáne oıyn-saýyq oryndarynda kámeletke tolmaǵandardy anyqtaý boıynsha reıdter jalǵasýda.