Astanadaǵy respýblıkalyq jármeńkege 100-ge jýyq qolónershi kelgen
ASTANA. KAZINFORM — Elordadaǵy Astana Mall saýda-oıyn saýyq ortalyǵynda «Uly dala qolónershiler kerýen kóshi» respýblıkalyq jármeńkesi ótip jatyr, dep habarlady qala ákimdiginiń resmı saıty.
— Táýelsizdik kúnine oraı «Uly dala qolónershiler kerýen kóshi» jármeńkesin uıymdastyryp otyrmyz. Mundaǵy maqsat — otandyq qolónershilerdiń basyn qosý, olardyń jasaǵan dúnıelerin kópshilikke usyný, ulttyq ónerdiń damýyna serpin berip, qolóner sheberlerin qoldaý jáne turǵyndarǵa erekshe etnomádenı atmosfera syılaý. Satylymǵa shyǵarylǵan dúnıelerdiń baǵasy — kópshilikke qoljetimdi. Sondaı-aq jármeńke aıasynda erekshe qajettilikteri bar balalar sán kórsetilimin ótkizedi. Maqsat — olardy qoǵamǵa beıimdeý. Búgin bastalǵan jármeńke úsh kúnge jalǵasady, — dedi QR «Has Sheber» otandyq ónimdi damytý qaýymdastyǵynyń prezıdenti Zıýar Jumanova.
Munda Qaraǵandy, Qostanaı, Qyzylorda sekildi oblystardan 100-ge jýyq qolónershi kelgen.
Olardyń bireýi oıynshyq, endi biri áshekeı buıymdaryn elorda turǵyndary men qonaqtaryna usynyp otyr.
— Bul jármeńkege Kókshetaýdan kelip otyrmyn. Osy ispen 5 jyldan beri aınalysamyn. Negizinen bul — pandemııa ýaqytynda hobbıden bastalǵan kásip. Qazaqı oıýlarmen órnektelgen taqııa tigemin, qyz-kelinshekterge arnalǵan áshekeı-buıymdar jasaýmen shuǵyldanamyn. Bastysy bul is maǵan unaıdy. Jasaǵan dúnıelerimdi áleýmettik jeli arqyly jáne jármeńkelerde satamyn, — dedi Jibek Sultanova.
Jármeńke saǵat 9.00-den 20.00-ge deıin bolady.
Munda kelýshiler elimizdiń túkpir-túkpirinen jınalǵan sheberlerdiń qolynan shyqqan biregeı buıymdardy kórip, ulttyq ónerdiń jandanýyna kýá bola alady.
Qala turǵyndary men qonaqtary úshin kirý tegin.
Budan buryn Túrkistanda Qolónershiler qalashyǵy ashylǵanyn jazǵan edik.