Astanadaǵy iri AI-hakatonda myńdaǵan IT-maman bas qosady
ASTANA. KAZINFORM — 23 qyrkúıekte Astanada Qazaqstan men ózge elderden myńdaǵan ázirleýshiniń, stýdenttiń, jas maman men IT-entýzıastyń basyn qosatyn álemdegi eń iri AI-hakatondardyń biri — HackAlem AI ótedi. Hakatonnyń resmı seriktesi — OpenAI.
HackAlem AI qatysýshylary jeke AI-sheshimderin ázirlep, iske qosý úshin jalpy quny 1 mıllıon dollarǵa deıingi OpenAI tehnologııalyq resýrstaryn paıdalana alady. Jeńimpazdarǵa qosymsha 100 myń dollar kólemindegi OpenAI API-tokenderi tabystalady, al hakatonnyń jalpy aqshalaı júlde qory 100 myń dollardy quraıdy. Osylaısha, HackAlem AI júldeleri men tehnologııalyq resýrstarynyń jalpy quny 1,1 mıllıon dollarǵa jetedi. Jeńimpazdardy marapattaý rásimi AI & Digital Bridge 2026 halyqaralyq tehnologııalyq forýmynyń tórinde ótedi.
Tirkelý bastaldy. Qatysýǵa ótinishti hackalem.ai saıty arqyly berýge bolady.
HackAlem AI — qatysýshylar qysqa merzim ishinde ıdeıadan bastap, naqty jumys isteıtin AI-sheshimderdi ázirlep shyǵara alatyn alańǵa aınalmaq. Komandalar bıznes, memleket jáne ekonomıkanyń túrli salalaryndaǵy ózekti máselelerdi sheshýge baǵyttalǵan tehnologııalyq ónimder jasaıdy.
Hakatonǵa kámelet jasyna tolǵan ázirleýshiler, stýdentter, jas mamandar men IT-entýzıastar qatysa alady. Qatysýshylardyń IT jáne tehnologııa salasynda bilimi nemese jumys tájirıbesi bolýy shart. Ne bolmasa, olar óz biliktiligin jeke jobalary, prototıpteri, qosymshalary nemese zertteý jumystary arqyly dáleldeı alýǵa tıis. Sonymen qatar IT, baǵdarlamalaý, ınjenerııa, tehnologııa, matematıka nemese tsıfrlyq ónim dızaıny baǵyttary boıynsha oqyp jatqan nemese keıingi 12 aı ishinde kúndizgi bólimde bilim alǵan stýdentter men jas mamandar da baq synaı alady.
Hakatonǵa qatysýdyń mindetti sharty — 2026 jylǵy 23 qyrkúıekte Astanadaǵy is-shara alańynda qatysýshynyń óziniń bolýy. Jol júrý, jatyn oryn jáne Astanada bolýmen baılanysty barlyq shyǵyndardy qatysýshylar ózderi óteıdi.
OpenAI tehnologııalarymen jumys isteý múmkindiginen bólek, qatysýshylarǵa HackAlem AI fırmalyq merchi men ataýly sertıfıkattar tabystalady. Oǵan qosa, hakaton kásibı netvorkıng ornatýǵa taptyrmas alańǵa aınalmaq: munda qatysýshylar Qazaqstan men shet elderden kelgen ázirleýshilermen, AI-entýzıastarmen, startapshylarmen jáne tehnologııalyq sala ókilderimen tanysyp, baılanys ornata alady.
Eske salaıyq, buǵan deıin Qazaqstannyń halyqaralyq spýtnıktik tobyna taǵy birneshe el qosylýy múmkin ekenin jazǵan edik.
