Astanadaǵy Qazaqstan Barysy Grand Slam jarysynda 4 Olımpıada chempıony baq synaıdy

ORAL. KAZINFORM – Astanada 9-11 mamyr kúnderi dzıýdodan álemdik reıtıngilik «Qazaqstan Barysy Grand Slam» týrnıri ótedi.

Qazaqstan dzıýdo federatsııasynan málim etkenindeı, álemniń kil myqtylaryn jınaıtyn bul básekeni kórermender Jaqsylyq Úshkempirov atyndaǵy jekpe-jek saraıynda tamashalaı alady. 

Elimizde bıyl úshinshi ret uıymdastyrylyp otyrǵan baıraqty dodaǵa álemniń 50 elinen 400-den astam sportshy qatysady dep josparlanǵan. Olardyń arasynda Olımpıada chempıondary Rafaela Sılva (Brazılııa, 63 kg), Beatrıs Soýza (Brazılııa, +78 kg), Barbara Matıch (Horvatııa, 70 kg) jáne Olımpıadada eki dúrkin jeńimpaz atanǵan Takanorı Nagase (Japonııa, 81 kg) bar. 

Qazaqstan da myqty quramyn báıgege qospaq. 

Astana jarysy Majarstanda 13-20 maýsymda ótetin álem chempıonaty aldyndaǵy qorytyndy týrnır bolmaq. 

Atalmysh dodanyń nátıjesinde IJF erejelerine sáıkes jarystyń jeńimpazdary men júldegerleri arasynda álemdik jáne olımpıadalyq reıtıngilerde upaılar bólinedi. Atap aıtqanda, І oryn úshin 1 myń, kúmis júldegerge – 700, al qola alǵandarǵa 500 upaı esepteledi. 

Eske sala keteıik, budan buryn Ábıba Ábýjaqynovanyń Tájikstanda ótetin Grand Slam jarysyna qatysatynyn jazǵan bolatynbyz.