Astanadaǵy «Otbasy bank» fılıaldarynda uzyn-sonar kezek paıda boldy

ASTANA. KAZINFORM — Astanadaǵy «Otbasy bank» fılıaldarynda uzyn-sonar kezek paıda boldy. Tańerteńgi 09:0-de talon alǵan adamdardyń ózine endi ǵana qyzmet kórsetilip jatyr, dep habarlaıdy Kazinform.

Máńgilik el, 27 mekenjaıyndaǵy bank fılıalynyń qabyldaý bólimi qyzmetkerleriniń aıtýynsha, búgin qyzmet alýǵa júgingen adamdardyń sany ádettegiden kóp. 

— Demalys kúnderi depozıt salymshylaryna memlekettik syılyqaqy túsip boldy. Kúni erteń «Naýryz» baǵdarlamasy boıynsha ótinim qabyldaý bastalady. Osy aralyqta adamdar otbasy músheleriniń, týystarynyń atyna ashylǵan depozıt uıashyqtaryn biriktirip úlgerýge asyǵyp jatyr. Sodan da qyzmet alýshylar sany kúrt kóbeıip ketti dep oılaımyn, — deıdi konsýltanttar.

Al «Otbasy bank» mobıldi qosymshasy arqyly kezekti brondaýdyń eń jaqyn datasy 11 naýryzdan bastalyp tur.

Odan bólek, kezekte turǵandar arasynda Zeınetaqy qorynan Otbasy bankindegi arnaıy shotqa aýdarylǵan qarjymen ıpotekalyq nesıeni ishinara jabýǵa kelgender de bar. Olardyń biri bul operatsııany onlaın jasaı almaıtynyn aıtady. Al endi biri koronavırýs karantıni kezinde «3 aılyq nesıelik kanıkýl» alýy sebepti bul operatsııa endi oǵan tek oflaın túrde jasalatynyn aıtady.

Aıta keteıik, 5 naýryzda «Naýryz» baǵdarlamasynyń ekinshi kezeńi iske qosylady.

17 naýryzda «Naýryz jumysker» baǵdarlamasyna ótinim qabyldaý bastalady.