Astanadaǵy órt: «7 bochek» turǵyndary qonaqúılerge ornalastyrylady

ASTANA. KAZINFORM — «7 bochek» turǵyn úı kesheniniń zaqymdanǵan qasbet pen basqa da shyǵyndardy qalpyna keltirý jumystary jedel túrde bastalady, dep habarlaıdy Astana ákimdiginiń baspasóz qyzmeti.

4 maýsym kúni saǵat 00:26–da «7 bochek» turǵyn úı kesheniniń (Syǵanaq kóshesi, 23) syrtqy qaptamasynyń janýy týraly qońyraý tústi. Oqıǵa ornyna dereý Astana qalasynyń ákimdigi, TJD jáne PD birlesip jedel shtab qurdy. TJD men PD qyzmetkerleriniń úılesimdi is-áreketteriniń arqasynda órt jyldam sóndirildi. Qaza tapqandar men zardap shekkender joq.

— Astana qalasynyń ákimdigi qajet bolǵan jaǵdaıda turǵyndardy qala qonaqúılerine ýaqytsha ornalastyrýdy uıymdastyrady. Sonymen qatar, jan-jaqty kómek kórsetiledi. Sondaı-aq, zaqymdanǵan qasbet pen basqa da shyǵyndardy qalpyna keltirý jumystary jedel túrde bastalady, — delingen vedomstvo habarlamasynda.

Ákimdik atap ótkendeı, uqsas oqıǵalar bolǵan jaǵdaılarda jergilikti atqarýshy organdar órt saldaryn joıý boıynsha barlyq qajetti sharany qabyldaıdy. Buǵan deıin apatty jataqhanada (Bulanty kóshesi, 14) bolǵan órt kezinde turǵyndar jańa páterlerge qonystandyrylǵan bolatyn.

Osydan buryn órtengen úıden 100-ge jýyq turǵyn óz betinshe dalaǵa shyqqany, TJD kúshteri 15 adamdy evakýatsııalaǵany habarlandy. Keıinnen «7 bochek» turǵyn úı keshenindegi órt 250 sharshy metrdi sharpyǵany anyqtaldy.