Astanadaǵy «OA – Qytaı» kezdesýi: óńirlik qaýipsizdik pen kıberqylmysqa qarsy jańa qadamdar aıqyndaldy
ASTANA.KAZINFORM - Astanada «Ortalyq Azııa – Qytaı» formatyndaǵy ishki ister jáne qoǵamdyq qaýipsizdik mınıstrleriniń ekinshi kezdesýi ótti, dep habarlaıdy Polisia.kz.
Qatysýshylar óńirlik qaýipsizdikti nyǵaıtý, transulttyq qylmysqa, esirtkiniń zańsyz aınalymyna, kıberqaýipterge qarsy is-qımyl jáne quqyq qorǵaý salasyndaǵy tsıfrlyq tehnologııalardy damytý máselelerin talqylady.
Іs-sharanyń Qazaqstan astanasynda ótýi elder arasyndaǵy senim deńgeıiniń joǵary ekenin jáne respýblıkamyzdyń óńir qaýipsizdigin qamtamasyz etýdegi róliniń artyp kele jatqanyn kórsetti.
- Zańdy, quqyqtyq tártip pen qoǵamdyq qaýipsizdikti qamtamasyz etý - barlyq memleketterdiń turaqty damýynyń basty basymdyǵy ári mańyzdy negizi. Memleket basshylary Ortalyq Azııa - Qytaı ekinshi sammıti barysynda birqatar basym baǵytty aıqyndady: saýda-ekonomıkalyq baılanystardy damytý, kólik-logıstıkalyq yntymaqtastyq, ónerkásiptik kooperatsııa jáne lokalızatsııa, gýmanıtarlyq saladaǵy, týrızm men óńiraralyq baılanystardaǵy ózara is-qımyldy nyǵaıtý. Bul rette negizgi faktor – ortaq qaýipsizdik, - dedi QR Іshki ister mınıstri Erjan Sádenov.
Qazaqstan ІІM málimetinshe, 2024 jyldan beri Ortalyq Azııa elderi men Qytaıdyń quqyq qorǵaý organdary bizdiń elimizdiń suranysymen shetelde boı tasalap júrgen 86 qylmyskerdi izdep tapqan.
Óz kezeginde qazaqstandyq polıtseıler seriktes elderge izdeýde júrgen 656 qylmyskerdiń ornalasqan jerin anyqtap, ustaýǵa kómektesti. Bul halyqaralyq yntymaqtastyq pen jedel aqparat almasýdyń joǵary tıimdiligin kórsetedi.
Kelissózderdiń bir bóligi quqyq qorǵaý organdaryn tsıfrlandyrý máselesine arnaldy. Qazaqstan men Qytaı «aqyldy qala» tehnologııalaryn, ıntellektýaldy beınebaqylaý júıelerin, jasandy ıntellektini, úlken derekterdi taldaý jáne qoǵamdyq qaýipsizdikti qamtamasyz etýge arnalǵan bıometrııalyq sheshimderdi engizý boıynsha tájirıbe almasýdy jalǵastyryp keledi. Sondaı-aq taraptar kıberqylmysqa qarsy is-qımyl jáne kásibı ári akademııalyq yntymaqtastyqty damytý máselelerin talqylady.
Kezdesý qorytyndysy boıynsha taraptar seriktestikti odan ári nyǵaıtýǵa, jedel aqparat almasýdy keńeıtýge jáne zamanaýı syn-qaterler men qaýipterge birlesip áreket etýge daıyn ekenderin rastady. Budan bólek, mınıstrler qazaqstandyq polıtsııa jumysyna engizilgen tsıfrlyq sheshimdermen tanysty. Qonaqtarǵa zamanaýı beınebaqylaý júıeleri, jasandy ıntellekt elementteri, jedel áreket etý servısteri jáne polıtsııa qyzmetiniń tıimdiligin arttyrýǵa baǵyttalǵan tsıfrlyq platformalar tanystyryldy.
Jalpy halyqaralyq yntymaqtastyqty odan ári damytý búkil óńirdegi turaqtylyqty, qaýipsizdik pen quqyqtyq tártipti nyǵaıtýǵa yqpal etetin bolady.
Osyǵan deıin Qaraǵandy oblysynda 5 jyl boıy halyqaralyq izdeýde júrgen qylmysker ustalǵany týraly jazdyq.
